Elordadaǵy birqatar kósheniń ataýy ózgeredi. Bul týraly tilderdi damytý jáne muraǵat isi basqarmasynyń basshysy Tileýǵali Qyshqashbaev aitty, dep habarlaidy QazAqparat.
«2021 jyly ótken Nur-Sultan qalasy onomastikalyq komissiiasynyń otyrysynda Nur-Sultan qalalyq máslihaty turaqty komissiiasynyń kópshilik tyńdaýynda elordamyzdyń keibir kóshelerine ataý berý jáne qaita ataý týraly usynystar qaralyp, qoldaý tapqan bolatyn. Almaty aýdany boiynsha jobalyq kóshelerge Uzaqbai Qulymbetovtyń, Ánýarbek Baijanbaevtyń, Maqtai Saǵdievtiń, Kámen Orazalinniń, Amanjol Bólekbaevtyń, Baiken Áshimovtyń, Keńshilik Myrzabekovtyń, Rahmanqul Berdibaidyń, Salyq Zimanovtyń, Hiýaz Dospanovanyń jáne jeti bidiń biri – Ánet babanyń, Juban Moldaǵalievtiń, Roza Baǵlanovanyń, Berdiǵoja batyrdyń, Ýáli Halfinniń jáne Qazaq radiosy ataýyn, Baiqońyr aýdany boiynsha Jumabek Táshenov kóshesiniń ataýynda bir árip qate ketýine bailanysty «Jumabek Táshenev» dep jazyp, moraldyq turǵyda ataýlary eskirgen kóshelerdi qaita ataý týraly, Baiqońyr aýdanynyń keibir kósheleriniń bólikterine Yrǵaily, Aqjarly, Shoqpartas, Shielisai, Sheńgeldi, Qarǵaly, Úńgirtas, Tuzdykól, Túrgen, Tekeli, Tastóbe, Taldybulaq, Óleńtisai, Oiqaraǵai, Jirenkól syndy elimizdiń jer-sý ataýlaryn berý týraly usynystar qoldaý tapty», - deidi Tilderdi damytý jáne muraǵat isi basqarmasynyń basshysy Tileýǵali Qyshqashbaev.
Onyń aitýynsha, Esil aýdany boiynsha Ilinka turǵyn alabyn jáne Úrker shaǵyn aýdanyn biriktirip, «Úrker» turǵyn alaby dep qaita ataý týraly, Novyi aeroport kóshesin «Jańa dariia», Syǵanaq jáne jobalyq ataýy E10 kóshelerin biriktirip «Syǵanaq» kóshesi dep qaita ataý týraly usynystar da qoldaý tapqan.
«Saryarqa aýdany boiynsha Pionerskaia kóshesin Talshyn kóshesi dep, Mostopoezd 463 kóshesin Jartas dep qaita ataý týraly sheshim qoldaý tapty. Elordada eki taras Shevchenko kóshesi bar. Medeý kóshesine deiin jalǵasqan Taras Shevchenko kóshesin Katonqaraǵai kóshesi dep qaita ataý týraly, ekinshi Almaty jáne jobalyq ataýy S409 kóshelerin biriktirip áigili opera jáne kameralyq ánshi, KSRO ártisi Ermek Serkebaevtyń esimin berý týraly usynystar qoldaý tapty», - deidi ol.
