Parijde «Rolan Garros» týrniriniń jerebesi tartylyp, qazaqstandyq tennisshilerdiń qarsylastary belgili boldy, dep habarlaidy "Ult aqparat".
Áielder arasynda Qazaqstannyń birinshi, álemniń 18-raketkasy Elena Rybakina alǵashqy ainalymda dúniejúzilik reitingte 83-orynda turǵan rýmyniialyq Sorana-Mihaela Kyrstiamen kezdesedi.
Frantsiia ashyq chempionatynyń 14-raketkasy bolyp tirkelgen E.Rybakina 21-de bolsa, tájiribeli qarsylasy biyl 30-ǵa toldy.
Álemniń 27-raketkasy, 25-tegi Iýliia Pýtintseva reitingte 79-satydaǵy taǵy bir tisqqan oiynshy, 34 jastaǵy belgiialyq Kirsten Flipkenspen kortqa shyǵady.
Reitingte 76-orynda turǵan Zarina Diias Týnis eliniń jaryq juldyzy, álemniń 35-raketkasy Ons Jabermen sheberlik baiqasady.
Erler arasynda Qazaqstannyń birinshi, álemniń 56-raketkasy Aleksandr Býblik pen reitingte 87-orynda turǵan Mihail Kýkýshkinge myqty tennisshiler tap boldy. A.Býblik Frantsiianyń basty úmiti, álemniń 9-raketkasy Gael Monfispen, al M.Kýkýshkin reitingte 15-orynda turǵan italiialyq Fabio Foninimen aiqasady.
Qazirgi kezde irikteý saiystary ótip jatqan «Rolan Garros» týrniri (júlde qory – 38 mln eýro) 11 qazanda márege jetedi.
Ótken jyly erler arasynda ispaniialyq Rafael Nadal chempion atansa, áielderden aýstraliialyq Eshli Barti úzdik shyqqan bolatyn. Biyl R.Nadal sol ataǵyn saqtap qalý úshin synǵa túsetin bolsa, álemniń 1-raketkasy E.Barti koronavirýs indetinen saqtanyp, maýsymdy erte aiaqtaǵandyqtan, dodaǵa qatyspaidy.
2019 jyly qazaqstandyqtar onsha sátti óner kórsetken joq. Z.Diias pen A.Býblik ekinshi, E.Rybakina, Iu.Pýtintseva jáne M.Kýkýshkin alǵashqy ainalymnan asa almady.
