Qysqametrajdy «Asan» kórkem filmi jáne «Ata kásip» derekti filmi 24-30 sáýir aralyǵynda Tatarstannyń astanasynda ótetin XV halyqaralyq musylman kinosy festivaline qatysady, dep habarlaidy "Ult aqparat" «Qazaqfilm» kinostýdiiasyna silteme jasap.
Atalǵan kinolar «Úzdik qysqametrajdy film» jáne «Úzdik derekti film» nominatsiialary boiynsha baq synaidy. Bul týyndylardy QR Mádeniet jáne sport ministrligi tapsyrysy boiynsha Sh.Aimanov atyndaǵy «Qazaqfilm» AQ túsirdi.
Musylman kinosy festivaliniń quryltaishysy - Tatarstan Respýblikasynyń Mádeniet ministrligi. Atalǵan is-shara Tatarstan kinematografister odaǵy men Qazan memlekettik mádeniet institýtynyń uiymdastyrýymen ótedi. Biyl festivaldiń konkýrsyna túsken filmderdi Daniia, Ońtústik Koreia syndy 10 memlekettiń belgili kinematografisteri baǵalaityn bolady.
«Asan» qysqametrajdy filmi ákesin aqtyq saparǵa shyǵaryp salýǵa jolǵa shyqqan bozbala týraly baiandaidy. Al «Ata kásip» derekti filmi Qazaqstanda turatyn ózbek halqy týraly, onyń ishinde Ońtústik Qazaqstan oblysynda turatyn ózbek halqynyń ókili, ata kásip - besik jasaýmen ainalysatyn qyryq jeti jasar Abdimannop Zýparov esimdi sheberdiń ómirin baiandaidy.
«Osy festivalde meniń eki birdei filmderimniń kórsetiletinine qýanyshtymyn. Maǵan senip, qoldaý bildirgenderi úshin «Qazaqfilm» kinostýdiiasynyń basshylyǵyna alǵysymdy aitamyn», - dedi filmderdiń rejisseri Berik Jahanov.
Esterińizge sala ketsek, byltyr «Asan» filmi 71-shi Halyqaralyq Kann kinofestivaliniń Short Film Corner aiasynda (álemniń qysqametrajdy týyndylaryna arnalǵan) kórsetilgen bolatyn. Sonymen qatar 2018 jyly kartina birneshe halyqaralyq kinofestivalderge qatysyp, kóptegen júldelerge ie boldy, atap aitsaq, respýblikalyq «Baiqońyr» festivalinde «Úzdik akter» júldesimen, Bakýde ótken 9-shy Halyqaralyq Start film festival kinofestivalinde qazylar alqasynyń arnaiy júldesimen, «Úzdik qysqametrajdy film» nominatsiiasy boiynsha «Qulager» júldesimen, Tashkentte ótken «Prolog» kinofestivalinde arnaiy júldemen jáne Ekaterinbýrg qalasynda ótken XV Halyqaralyq «Kinoproba» kinomektebi festivalinde qazylar alqasynyń arnaiy júldesimen marapattaldy.
Al «Ata kásip» derekti filmi de birneshe júldelerge qol jetkizgen bolatyn. Byltyr Almatyda ótken VII Halyqaralyq «Bastaý» kinofestivalinde derekti film Oraz Ábishev atyndaǵy júldeni iemdendi. Sondai-aq Baýyrjan Nógerbektiń 70 jyldyǵyna arnaiy uiymdastyrylǵan kinofestivalde qazylar alqasynyń júldesimen jáne Vosmerka.kz saitynyń arnaiy júldesimen (taqyrypqa tereń úńilip, derekti filmderdi túsirý dástúrine bar yqylaspen berilgen úshin) marapattaldy.
