Áýe reisi keiinge shegerilse, jaýapty kompaniia jolaýshylarǵa zań aiasynda jaǵdai jasaýy tiis. Shart oryndalmasa áýe kompaniiasyna 200-den 1000 AEK-ke deiin aiyppul salynady, dep habarlaidy QazAqparat.
«Azamattyq aviatsiiadaǵy basty maqsat - jolaýshylardy tasymaldaý qaýipsizdigi. Áýe kompaniialary jolaýshy qaýipsizdigi men qosymsha shyǵyndardy boldyrmaý maqsatynda kestege sai jumys isteýge múddeli bolýy tiis. Áýe reisteri keshigýiniń nemese keiinge shegerilýiniń negizgi sebebi - áýe kemesinen shyqqan tehnikalyq aqaý nemese aýa raiynyń qolaisyzdyǵyna bailanysty. Osyǵan orai reisterdiń keshigýi áýe tasymaly úshin qalypty qubylys», - dedi QR Indýstriia jáne infraqurylymdyq damý ministrligi azamattyq aviatsiia komiteti tóraǵasynyń orynbasary Saltanat Tompieva OKQ-de brifingte.
Onyń aitýynsha, áýe reisi keshikken jaǵdaida qyzmet kórsetýshi kompaniia jolaýshyǵa zań aiasynda jaǵdai jasaýy tiis.
«Áýe kompaniiasynyń ókilderi jolaýshyǵa 2 ret qońyraý shalyp eskertýi kerek. Salqyn sýsyn men ystyq tamaq usynyp, qonaq úimen qamtýy qajet. Sonymen qatar jolaýshyny qonaq úige deiin jáne áýejaiǵa qaita jetkizýge mindetti. Reistiń keshikken ár saǵaty úshin tasymaldaýshy bilet qunynyń 3% mólsherinde aiyppul tóleidi. Joǵaryda kórsetilgen talaptardy oryndamaǵan jaǵdaida áýe kompaniiasy 200-den 1000 AEK-ke deiin aiyppul túrinde ákimshilik jaýapkershilikke tartylady. Odan bólek, qazirgi ýaqytta jolaýshylardyń quqyǵyn qorǵaý maqsatynda áýe reisi keshikkenine salynǵan aiyppuldy tólemegeni úshin ákimshilik jaýapkershilik engizý máselesi qarastyrylyp jatyr», - deidi ol.
Sondai-aq, aviatsiia komitetiniń ókili Qazaqstanda 2016 jyldan bastap áýe kompaniialary bilet baǵasyn derbes júrgizetinin eske saldy.
