Qasym-Jomart Toqaev Ekibastuz qalasyna ótip jatqan monoqalalardy damytý jónindegi keńeste eldegi epidemiologiialyq jaǵdaidyń turaqsyz ekenin aitty, dep habarlady "Ult aqparat" Aqordanyń baspasóz qyzmetine silteme jasap.
"Epidemiologiialyq jaǵdai turaqsyz bolyp otyr – kún saiyn otyzǵa jýyq adam qaitys bolady. Buǵan vaktsinatsiia qarqynynyń tómendeýi áser etip otyr. 9 ai ishinde halyqtyń shamamen 40%-ti qamtydy", - dedi Prezident.
Memleket basshysynyń aitýynsha, kóptegen el halyqty qaita vaktsinatsiialaýǵa kiristi.
"Biz vaktsina saldyrý naýqanyn naýryzda bastaǵanymyzdy eskersek, bizge de revaktsinatsiia jasaityn ýaqyt keldi. Úkimet pen ákimder halyqty qaita vaktsinalaý naýqanyna kirisýi kerek", - dedi Toqaev.
Aita keteri, Densaýlyq saqtaý ministrligi qarashanyń úshinshi onkúndiginen halyqty revaktsinatsiialaýdy josparlap otyr. Qaita vaktsinalaý kezinde adamdarǵa vaktsinanyń tek bir dozasy egiledi.
"Koronavirýsqa qarsy vaktsinalaýdyń tolyq kýrsy aiaqtalǵannan keiin 6-9 aidan soń qosymsha doza saldyrý usynylady", - degen edi Aleksei Tsoi.
Spýtnik V vaktsinasyn saldyrǵandar 9 aidan keiin inaktivtelgen Sinopharm, CoronaVac, Hayat-Vax, QazCovid-in nemese Pfizer vaktsinasyn ala alady.
Al, kerisinshe, Sinopharm, CoronaVac, Hayat-Vax, QazCovid-in vaktsinasy egilgenderge 6 aidan soń vektorlyq Spýtnik V nemese m-RNK-vaktsina (Pfizer) salynady.
Pfizer salǵyzǵandarǵa alty aidan keiin inaktivtelgen Sinopharm, CoronaVac, Hayat-Vax, QazCovid-in nemese vektorlyq Spýtnik vaktsinasyn qaita salý usynylady.
