WBC, WBA (Super) jáne IBO tujyrymdary boiynsha orta salmaqta álem chempiony qazaqstandyq Gennadii Golovkin men meksikalyq Saýl "Kanelo" Alvares ekinshi jekpe-jegi jaily kelisimge keldi, - dep habarlaidy Vesti.kz.
Alvarestiń múddesin qorǵaityn promoýter Oskar De La Hoiianyń aitýynsha, kezdesý 15 qyrkúiekte ótedi. Bul kún - Meksikanyń Táýelsizdik kúniniń ýik-endi.
"Kezdesýdiń 15 qyrkúiekte ótetinin asa qýanyshpen jariia etemin, #CaneloGGG2", - dep jazdy Oskar de La Hoiia Twitter jelisinde.
Aita keteiik, Golovkin men Alvarestiń qorytyndy kelissózderi resmi jariialanymǵa bir jarym saǵat qalǵanda ótken. Bastapqyda Oskar de La Hoiia ESPN basylymyna bergen suhbatynda "ekinshi kezdesý ótpeidi, bul 100 paiyz" dep málimdegen. Alaida bes minýt ótkende taraptar qaita talqylaýǵa kóshken.
Al odan bir táýlik buryn meksikalyq Saýl "Kanelo" Alvarestiń isin júrgizetin Golden Boy Promotions promoýterlik kompaniiasynyń prezidenti Erik Gomes qazaqstandyq Gennadii Golovkinge ýltimatým qoiǵan. Gomestiń sózinshe, olar Golovkinge qyrkúiekte bolýy múmkin qarymtanyń kirisin bólisý týraly sońǵy usynystaryn aitqan. Ol shart boiynsha tabys Alvarestiń paidasyna 57,5-te 42,5 bolyp bólinedi.
Eske salaiyq, Golovkin men "Kanelo" arasyndaǵy alǵashqy jekpe-jek byltyr 16 qyrkúiekte T-Mobile arneasynda ótip, tóreshiler sheshimi boiynsha teń aiaqtalǵan. Ol kezde qazaqstandyq túsken tabystyń 30 paiyzyn ǵana alǵan.
Degenmen Golovkin men «Kanelo» arasyndaǵy ekinshi jekpe-jektiń qarjylyq málimetteri jariialanbai otyr. Biraq boksshylar birinshi aiqasqa qaraǵanda áldeqaida kóp tabys taba alady.
«Endi bokstaǵy eń úlken jekpe-jek bolatyn revansh ótedi. Golovkin men Alvares byltyr qyrkúiekte T-Mobile arenada kezdesip, ásirese Golovkin úshin daýly nátijemen aiaqtalǵan edi. Biylǵy revansh ta sol jerde ótpek. Sol jekpe-jekti kórý úshin 1,3 million aqyly satyp alý jasaldy jáne biletterdiń saýdasynan 27 million dollar paida tústi. Bul - boks tarihyndaǵy úshinshi kórsetkish. Adamdardyń kópshiligi revanshtyq aiqas osy eki tsifradan asyp túsip, Golovkin 40 millionnan astam dollar tabys tabatynyn aitýda», - dep jazady espn.com saity
