Reseilik alaiaqtar elorda turǵynynyń 137 million teńgesin jymqyrǵan, - dep habarlaidy Polisia.kz.
Elorda turǵyny politsiiaǵa aryzdanyp, belgisiz bireýler onyń 137 094 000 teńge qarajatyn aldaý jolymen iemdenip ketkenin aitqan.
Er adamnyń aitýynsha, oǵan telefon arqyly belgisiz eki adam qońyraý shalǵan. Olardyń biri ózin qala prokýrorynyń orynbasary retinde, al ekinshisi ózin qarjylyq baqylaý bóliminiń qyzmetkeri retinde tanystyrǵan. Olar jábirlenýshige alaiaqtar shotynan aqsha alýǵa tyrysyp jatqanyn jáne bul aqshany saqtaý úshin ony banktiń kepildik shotyna jiberý kerek ekenin aitqan. Osylaisha, jábirlenýshi óziniń barlyq aqshasyn 15 ret túrli shotqa aýdarǵan.
Jedel-izdestirý sharalary barysynda "Saryarqa" aýdanynyń jedel ýákil qyzmetkerleri kúdiktilerdiń biri - Resei Federatsiiasynyń 33 jastaǵy azamatyn ustady. Qylmystyq toptyń eki qatysýshysy respýblikadan tys jerde jasyrynyp úlgergen. Qazir izdestirý sharalary júrgizilip jatyr.
Elorda aýmaǵynda qylmystyq top jalǵan tulǵalar arqyly bank kartalaryn rásimdegeni anyqtalǵan. Bir ai ishinde kúdiktiler elimizdiń ártúrli bankinde ashylǵan 35 bank kartasyn alǵan. Alaiaqtyq áreketterden alynǵan aqshany olar qolma-qol aqshaǵa ainaldyryp, keiin AQSh dollaryna aiyrbastaǵan. Sodan soń qaskúnemder valiýtany kriptovaliýtaǵa aiyrbastap, Resei Federatsiiasyna jibergen.
Qazir ustalǵan alaiaq tergeý izoliatoryna qamaldy. Qylmystyq toppen asa iri mólsherde alaiaqtyq jasaý deregi boiynsha QR Qylmystyq kodeksiniń 190-baby 4-bóligi boiynsha sotaldy tergeý júrgizilip jatyr.
Nur-Sultan qalasynyń Politsiia departamenti túrli vedomstvolardyń basshylary men qyzmetshileriniń atynan qońyraý shalýmen bailanysty alaiaqtyqtyń jiilep ketkeni týraly eskertti.
“Eger sizge osyndai qońyraý tússe, eshqandai jaǵdaida SMS-kodty bermeńiz! Áńgimeni úzip, banktiń koll-ortalyǵynyń resmi telefondary boiynsha aqparatty naqtylańyz. Barlyq qaýipsizdik sharalaryn qosyńyz, 3D-Secure, sizdiń telefon nómirińizge SMS-habarlama jibermei eshqandai tólem jasalmaidy. Operatsiialardy júrgizý úshin osy kodty engizý arqyly ǵana rastai otyryp, qandai da bir tólem operatsiiasyn júrgize alasyz. Sondyqtan mundai qaýipsizdik ádisterin qosý kerek”, – dep eskertti politseiler.
