9 tamyzda Qyrym mańyndaǵy Novofedorovka kýrorttyq eldimekenindegi Saki aerodromynda birneshe jarylys boldy. Bul týraly jergilikti turǵyndar Reuters agenttigine aitqan.
Azattyq radiosynyń Krym. Realii saitynyń jazýynsha, munda áskeri qarý-jaraq qoimasy órtengen. Al Resei qorǵanys ministrligi aerodrom aýmaǵynda aviatsiialyq qarý-jaraq jarylǵanyn málimdedi.
Novofedorovka biligi de birneshe jarylys bolǵanyn rastady. Buǵan qosa, oqiǵa ornyna jedel járdem qyzmeti men sanitarlyq aviatsiia jiberilgen.
"Ýkrainskaia pravda" málimetinshe, áleýmettik jeli qoldanýshylary onnan asa jarylys estigenin jazǵan. Novofedorovkadan 20 shaqyrym jerdegi kólikterdiń dabyly qosylyp, terezeler synǵan.
Reuters málimetine súiensek, jergilikti ýaqyt boiynsha shamamen 15.30-da ártúrli qýatty kem degende 12 jarylys estilgen. Úsheýi zor jarylys bolǵan, odan ushqyn, al keiin qoiý tútin shyqqan. Shamamen 30 minýttan keiin taǵy bir jarylys bolǵan, ony kýágerler eń qattysy dep atady, odan da tútin men shań kóterilgen.
Ria Novosti habaryna qaraǵanda, Máskeý taǵaiyndaǵan Qyrym basshysynyń keńesshisi Oleg Kriýchkov Qyrymnyń batys jaǵalaýynda birneshe jarylys bolǵanyn rastaǵan.
Aita keteiik, Saki aerodromy Herson oblysyndaǵy Ýkraina áskeriniń pozitsiiasynan 200 shaqyrym jerde ornalasqan. Krym.Realii saitynyń jazýynsha, bul aerodromda Reseidiń 3-aviatsiialyq polki ornalasqan, polk quramynda Sý-30SM, Sý-33 jáne Sý-24M ushaqtary bar. Buǵan deiin polktiń Ýkrainadaǵy soǵysqa qatysyp jatqany aitylǵan.
Saki aerodromy 2014 jyldan beri Resei áskeriniń bazasyna ainalǵan. Resei bul jerden soǵys bastalǵaly jii ushaq ushyrady. 1945 jyly aqpanda bul aerodromǵa antigitlerlik koalitsiia basshylary – AQSh prezidenti Franklin Rýzvelt pen Britaniia premeri Ýinstron Cherchill mingen ushaqtar qonǵan. Olar munda Ialta konferentsiiasyna qatysýǵa kelgen edi.
