Reseiden ákelingen 250 kóliktiń moinynda sot aýyrtpalyǵy bar bolyp shyqty, dep habarlaidy QazAqparat.
QR Ishki ister ministrligi Ákimshilik politsiia komiteti tóraǵasynyń orynbasary Serik Túsipov vedomstvonyń aqparat alańynda ótken onlain brifingide osyndai málimet keltirdi.
«Qazaqstandyqtardyń shetelden ákelingen kólikterdi paidalaný máselesin jalǵastyrsaq, osy jyldyń tamyz aiynan bastap ishki ister organdary men memlekettik kirister organdary shekarada jatqan 7 óńirde Qazaqstan aýmaǵyna Resei Federatsiiasynan ákelingen kólikterge tekserý júrgizip jatyr. Barlyǵy 8 myńnan astam mashina tekserildi. Kóliktiń qaida tirkelgenin jáne moinynda aýyrtpalyǵy bar-joǵyn eki organnyń qyzmetkerleri Reseidiń keden qyzmetimen birlesip tekseredi. Sonyń qorytyndysy boiynsha sot aýyrtpalyǵy ótelmegen kólikterdiń ákelingeni anyqtalyp otyr», - degen ministrlik ókili sózine dálel retinde birneshe mysal keltirdi.
«Mysaly, tamyz aiynda Reseiden ákelingen bir kólikti tirkeýge 100-dei shekteý qoiylǵany belgili boldy. Sondyqtan bul kólik Qazaqstanda tirkeýge alynbaidy. Óitkeni Reseide tirkeýden shyǵarylýy úshin búkil aýyrtpalyqtary ótelýi kerek», - deidi komitet basshysynyń orynbasary.
Sondai-aq, mundai problemalar kólikterdiń jylyn tańdamaitynyn eskertti.
«Mundai táýekelder eski kólikterde de, jańa kólikterde de kezdesýi múmkin. Qyrkúiek aiynda 2020 jyly zaýyttan shyqqan Camry markaly kólik anyqtaldy. Ústinen 20-dan astam sot aýyrtpalyǵy rásimdelgen. Bul kólik keiin Reseidegi iesiniń ústinen aryzdanýshy tulǵalarǵa óndirilip berilýi múmkin. Jalpy 250-ge jýyq osyndai problemasy bar avtomobil anyqtaldy, - dedi Serik Túsipov.
