Voronej qalasyndaǵy Áskeri-áýe akademiiasynyń komandalyq fakýltetinde jáne aviatsiianyń jaýyngerlik is-qimyldaryn qamtamasyz etý fakýltetinde oqityn qazaqstandyq áskeri qyzmetshiler – magistratýra tyńdaýshylarynyń kúshimen aty ańyzǵa ainalǵan ushqysh, eki márte Keńes Odaǵynyń Batyry, aviatsiia general-maiory Talǵat Bigeldinov atyndaǵy dárishana ashyldy. Bul týraly "Ult aqparat" QR Qorǵanys ministrliginiń baspasóz qyzmetine silteme jasap.
Dárishanany qurý ideiasyn oqý ornynyń basshylyǵy qoldady. Akademiia bastyǵynyń áskeri-saiasi jumys jónindegi orynbasary polkovnik Andrei Eremin Uly Otan soǵysyndaǵy Jeńiske qol jetkizýde qazaqstandyq jaýyngerlerdiń orasan zor úles qosqanyn atap ótti.
Magistratýra tyńdaýshylarynyń atynan sóz sóilegen podpolkovnik Baqytjan Úsibáliev dańqty ushqyshtyń ómiri men erlikteri týraly derekter aitty.
Almaty qalasynyń Ortalyq memlekettik arhivinen dárishanaǵa arnalǵan eksponattar, atap aitqanda Talǵat Bigeldinovtiń memlekettik nagradalaryn qosa alǵanda, onyń jeke zattary, Il-2 ushaǵynyń maketi, «Altyn juldyz» medaldary men nagradtaý qujattarynyń kóshirmeleri, arhivtik fotosýretteri berildi.
Dańqty ushqyshtyń týǵan kúninde Aqtóbe qalasyndaǵy Áýe qorǵanysy kúshteriniń áskeri institýtynda eske alý is-sharalary bolyp ótti.
Áskeri qyzmetshiler eki márte Keńes Odaǵynyń Batyry Talǵat Bigeldinovtiń músinine gúl shoǵy salynǵan sebetter qoidy.
