Reseide 28 naýryz kúni Kemerovodaǵy saýda ortalyǵynda bolǵan órtten qaza tapqandardy aza tutyp jatyr. Búgin órt qurbandarynyń aldy jerlene bastaidy.
Kemerovodaǵy "Zimniaia vishnia" saýda jáne oiyn-saýyq ortalyǵyndaǵy órt 25 naýryz kúni kúndiz bolǵan. Resmi málimet boiynsha, órtten 64 adam qaza tapqan. Qurbandardyń kópshiligi - balalar. Keibir málimet boiynsha, ortalyqta adamdar kúzetshilerdiń áreketinen jáne órt kezindegi dabyl belgisiniń qosylmai qalýynan kino zalynda jáne basqa da oryndarda qamalyp, shyǵa almai qalǵan.
27 naýryzda Reseidiń ondaǵan qalasynda órt qurbandaryn eske alý mitingileri ótken. Qaraly jiynǵa qatysqandar marqumdardy eske alyp sham jaqty, gúl, oiynshyqtar qoidy. Birneshe aimaqta resmi aza tutý kúni jariialandy.
27 naýryzda Kemerovoǵa Resei prezidenti Vladimir Pýtin bardy. Ol saýda ortalyǵy janyndaǵy eske alý ornyna gúl qoiyp, oblys basshylyǵymen kezdesti. Biraq Vladimir Pýtin de, Kemerovo oblysynyń gýbernatory Aman Tóleev te Kemerovo ákimdigi aldynda miting ótkizgenderge barmady.
Máskeýde de Pýshkin alańynda órt qurbandaryn eske alýǵa arnalǵan resmi emes aktsiia jáne Manejnyi alańynda meriia uiymdastyrǵan aktsiia ótti. Ishki ister ministrliginiń málimetinshe, aktsiialarǵa 12 myń adam jinaldy. Aktsiialardy uiymdastyrýshylar shara tynysh ótedi dep dolbarlaǵan. Biraq aktsiiaǵa qatysqandar "Pýtin otstavkaǵa ketsin!", "Tóleev otstavkaǵa ketsin!", Pýtinsiz Resei", "Kemerovo, biz senimen birgemiz!", "Balalardy óltirgenderge Kremlde oryn joq" dep urandatty.
Sankt-Peterbýrgte shamamen eki myń adam Mars alańynda ruqsatsyz aktsiia ótkizdi. Al qala biligi Dvorets alańynda resmi qaraly jiyn ótkizdi.
