Resei áskeri 27 maýsymda kúndiz Ýkrainananyń Poltava oblysyndaǵy Kremenchýk qalasyn zymyranmen atqylady. Kemi 13 adam qaza bolyp, 50-den astam adam jaralandy. Bul aqparatty Poltava oblysynyń áskeri ákimshiliginiń basshysy Dmitrii Lýnin rastady, dep habarlaidy Azattyq.
Resei zymyrany túsken "Amstor" saýda ortalyǵy túgel janyp ketken.
Kremenchýg meri Vitalii Maletskii "zymyran urys qimyldaryna múlde qatysy joq adamdar kóp júrgen orynǵa tústi" dep jazdy.
Ýkraina málimdemesine qaraǵanda, Resei áskeri Tý-22M3 bombalaýshy ushaǵy alyp júretin H-22 zymyranyn paidalanǵan. Áskeri ushaq Kalýjsk oblysynyń Shaikovka áýejaiynan ushyp shyǵyp, Kýrsk oblysynyń aspanynda zymyran atqan.
Kýágerlerdiń BBC News orys qyzmetine aitýyna qaraǵanda, shatyry ortasyna túsken saýda úiiniń astynda áli de kóp adam bolýy múmkin. Biraz adam zymyran túserden 15 minýt buryn dabyl daýysyn estip, saýda ortalyǵynan shyǵyp úlgergen.
Ýkrainanyń resmi aqparatyna qaraǵanda, dúisenbi kúni Resei Kremenchýgti eki zymyranmen atqan, biri saýda ortalyǵyna, ekinshisi stadionǵa túsken.
Britaniia premeri Boris Djonson "bul shabýyl - Resei basshysy Vladimir Pýtinniń asqan jaýyzdyǵy men jabaiylyǵyn bildiredi" dep málimdedi.
"Pýtin mundai áreketterinen túk shyqpaitynyn, kerisinshe Ulybritaniia sekildi G7 tobynyń barlyq elderi Ýkrainaǵa qansha kómek kerek bolsa, sonsha beretinin túsinýge tiis", — deidi Djonson.
