Resei qorǵanys ministrligi Ýkrainamen shektesetin aimaqtan áskerin áketip jatqanyn habarlady. Mekeme málimdemesinde Ońtústik áskeri okrýgindegi áskerdiń bir ailyq jattyǵýy aiaqtalǵanyna bailanysty 10 myńnan astam jaýynger keri qaitarylǵany aitylǵan, dep jazady Azattyq.
25 jeltoqsanda Ýkraina prezidenti Vladimir Zelenskii AQSh kongresmenderi jáne senatorlarmen onlain sóilesken. Onda Donbastaǵy baqylaý jáne orys-ýkrain shekarasyndaǵy Resei áskeri týraly sóz bolǵan.
Qarasha aiynda Conflict Intelligence Team uiymynyń zertteýshileri Resei Ýkrainamen shektesetin aimaǵyna áskerin jáne tehnikasyn ornalastyryp jatqanyn aitqan. Bul málimetti Pentagon da rastap, Resei-Ýkraina shekarasyndaǵy ásker týraly barlaý málimetterin Kievke bermek bolǵan.
Jeltoqsan basynda Resei prezidenti Vladimir Pýtin men AQSh lideri Djo Baiden video bailanys arqyly sóilesken. Baiden Máskeýge Ýkrainaǵa shabýyl jasasa, qatań sanktsiia salatynyn eskertken.
Al Pýtin Baidenge NATO áskeriniń Ýkraina aimaǵyna deiin keńeitilgenin qalamaitynyn jetkizgen.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036
