QR Premer-Ministriniń orynbasary Roman Skliar Jaiyq ózeni basseininiń ekologiialyq ahýalyn jaqsartý úshin qabyldanyp jatqan is-sharalardy atady, dep habarlaidy QazAqparat.
«Jaiyq ózeni basseinindegi ekologiialyq ahýaldy jaqsartý maqsatynda Resei tarapymen birlesken is-sharalar barysynda 2020 jylǵy 4 jeltoqsanda «Jaiyq transshekaralyq ózeni basseininiń ekojúiesin saqtaý jáne qalpyna keltirý jónindegi 2021-2024 jyldarǵa arnalǵan Qazaqstan-Resei yntymaqtastyǵy baǵdarlamasyna» qol qoiyldy jáne ózen sýyn arttyrý máselesin birlesip sheshý úshin «Iri ózender basseinderinde (Jaiyq, Ertis jáne basqalary) zertteýler júrgizý boiynsha yntymaqtastyqty jandandyrýdyń biryńǵai jol kartasy» bekitildi» delingen Roman Skliardyń Májilis depýtattary saýalyna bergen jaýabynda.
Onyń atap ótýinshe, baǵdarlamanyń birinshi baǵyty aiasynda «Jaiyq transshekaralyq ózeniniń basseinindegi aǵyndy retteýdiń saldaryn ekologiialyq baǵalaý jáne Jaiyq transshekaralyq ózenin saqtaý jáne qalpyna keltirý boiynsha ǵylymi negizdelgen usynystar ázirleý» taqyryby boiynsha ǵylymi-zertteý jumysyna tehnikalyq tapsyrma ázirlendi.
«Budan basqa, kóktemgi ór sýy keler aldynda transshekaralyq ózenderdiń gidrometereologiialyq jaǵdailaryn eskere otyryp, Resei Federatsiiasymen sý bólý kólemin ulǵaitý jumysy júrip jatyr. Atap aitqanda Jaiyq ózenindegi sý deńgeiin maýsymaralyq kezeńde ustap turý úshin maýsym-tamyz ailarynda Irikla sý qoimasynan sý ótimin sekýndyna 30 tekshe metrge deiin kóbeitý týraly ýaǵdalastyqqa qol jetti», - dep atap ótedi Roman Skliar.
