Resei soty oppozitsiialyq saiasatker Aleksei Navalnyidyń "Jemqorlyqpen kúres qory" men onyń aimaqtaǵy shtabtaryna qatysty sot sheshimi shyqqanǵa deiin qordyń jumysyn toqtatty. Bul týraly Twitter-de qordyń direktory Ivan Jdanov habarlady, dep jazady Azattyq.
16 sáýirde prokýratýra sottan oppozitsiialyq saiasatker Aleksei Navalnyi negizin qalaǵan "Jemqorlyqpen kúres qory" men onyń aimaqtaǵy bólimshelerin "ekstremistik uiym" dep tanýdy suraǵan.
"Liberaldyq urandardy jamylǵan bul uiymdar áleýmettik jáne qoǵamdyq-saiasi jaǵdaidy turaqsyzdandyrýmen ainalysady. Is júzinde olardyń kózdegeni konstitýtsiialyq qurylym negizderin ózgertý jáne soǵan jaǵdai jasaý" delingen prokýratýra habarlamasynda.
Habarlamada sonymen birge bul qurylymdardyń Resei aýmaǵynda qajetsiz halyqaralyq uiymdardyń jumys isteýine kómektesip otyrǵany da jazylǵan.
Jemqorlyqpen kúres qorynyń jetekshileri "Kreml is júzinde ózderimen kelispeitinderdi ekstremister dep tanýdy talap etip otyr" dep málimdedi. Olar biliktiń bul áreketin aldaǵy iri narazylyqqa daiyndyq pen memlekettik dýmaǵa sailaýmen bailanystyrady.
Jemqorlyqpen kúres qory, Azamattardyń quqyqtaryn qorǵaý qory men aimaqtyq shtabtar ústinen túsken shaǵym Máskeý qalalyq sotynda tirkelgen. Sot saitynda bul ister "Ózge uiymdardy joiý" kategoriiasymen berilgen. 19 sáýirde qalalyq sot qordyń qyzmetkerine bul "memlekettik qupiia" dep ispen tanysýǵa múmkindik bermegen.
