Resei Baiqońyrda jalǵa alǵan 11,6 myń gektar jerdi Qazaqstanǵa qaitarady, dep habarlaidy Sputnik Qazaqstan.
Búgin Senattyń jalpy otyrysynda "1994 jylǵy 10 jeltoqsandaǵy Qazaqstan Úkimeti men Resei Úkimeti arasyndaǵy "Baiqońyr" keshenin jalǵa berý shartyna ózgeris engizý týraly hattamany ratifikatsiialaý týraly" zań jobasy qaraldy.
Hattamaǵa sáikes, Resei jalpy alańy 11,6 myń gektar tórt jer ýchaskesin jalǵa alýdy toqtatady.
"Jalpy alańy 1740 gektar eki ýchaske Qarmaqshy aýdany Tóretam kentin keńeitý úshin, sondai-aq 9950 gektar eki ýchaske "Batys Eýropa-Batys Qytai" halyqaralyq tranzit dálizin, "Almaty-Máskeý" temirjolyn salý jáne "Beineý-Shymkent" gaz qubyrynyń jelilik bóligi úshin alynyp otyr", - dedi Aýyl sharýashylyǵy ministriniń mindetin atqarýshy Aidarbek Saparov.
Onyń aitýynsha, qaitarylatyn jer ýchaskeleri respýblikalyq mańyzy bar nysandardyń qurylysy úshin jáne Tóretam kentin damytý úshin qaita beriledi.
"Bul jergilikti halyqtyń ómir deńgeiin kóterýge yqpalyn tigizedi. Zań jobasy respýbikalyq biýdjetten qosymsha qarajat bólýdi talap etpeidi", - dep naqtylady Saparov.
Sondai-aq, ol Reseibul ýchaskelerdi jalǵa alýdy toqtatqanmen, jyl saiynǵy jaldaý aqysy sol kúii qalatynyn atap ótti.
Saparovtyń málimetine súiensek, qazir Resei Baiqońyrda 650 myń gektar jerdi jalǵa alyp otyr. Qazir 11,6 myń gektardy arendadan shyǵarylýda.
"Ári qarai bosaǵan jerler bolsa, onda tiisti jumys júrgiziledi. Al ázirge ondai josparjoq. Jalǵa alý aqysy 118 million dollar sol kúii qalady", - dedi ol.
Hattamaǵa eki el prezidentteriniń qatysýymen 2017 jylǵy 9 qarashada Cheliabinskide ótken forýmda qol qoiyldy.
Senat Májilis maquldaǵan zańdy biraýyzdan qabyldady.
