Resei bilim jáne ǵylym ministrligi reseilik ǵalymdarǵa sheteldik zertteýshilermen bailanysý erejesin qatańdatyp, buiryq shyǵardy. Vedomstvo buiryqty biyl shildeden bastap institýttarǵa tarata bastaǵan. Keibir azamattar muny SSSR kezinde ǵalymdarǵa qoiylǵan shekteýge uqsatty.
Qujat kóshirmesin «Troitskii variant» gazeti jariialady. Basylym maqalasynda bul qujattyń kúshin joiyp, mundai buiryq shyǵarǵandardy jazalaýdy suraǵan ǵalymdardyń ashyq haty bar.
Jańa buiryq boiynsha, ǵalymdarǵa mynadai shekteý bar:
- Reseilik ǵylymi uiymdar sheteldik zertteýshiler kezdesý ótetini týraly bilim jáne ǵylym ministrligine bes kún buryn eskertip, qatysýshylar tizimin joldaýy tiis;
- Kezdesýden soń jiynnan esep daiyndap, qatysqan azamattardyń pasportynyń kóshirmesin ótkizýge mindetti;
- Kezdesý reseilik ǵylymi uiymda ótip jatsa, jiynǵa kem degende Reseidiń eki zertteýshisi qatysýy kerek;
- Zertteýshi sheteldik ǵalymmen jumys ýaqytynan tys júzdespek bolsa, aldymen basshysynyń ruqsatyn alýy kerek;
- Reseidiń ǵylymi uiymyna kelgen sheteldik zertteýshi «jazý ne kóshirý quraldaryn» halyqaralyq kelisimderde kórsetilgen jaǵdailarda ǵana paidala alady.
Resei ǵylym akademiiasynyń vitse-prezidenti Aleksei Hohlov bul buiryqtyń Reseidi sheteldik zertteýshiler men stýdentterge tartymdy elge ainaldyrýdy kózdeitin «Ǵylym» jáne «Bilim» baǵdarlamalaryna qaishy ekenin aitady.
