sýret ashyq derekkózden alyndy
9 naýryzǵa qaraǵan túni jáne beisenbi kúni tańerteń orys áskeri Ýkrainaǵa zymyran jaýdyrdy. Eldiń barlyq aimaǵynda áýe dabyly iske qosyldy, dep jazady Azattyq.
Lvov ákimshiliginiń jetekshisi Maksim Kozitskii telegram-arnasynda Lvov oblysynyń Zolochev aýdanynda turǵyn úige zymyran túsip, bes adam opat bolǵanyn habarlady. Qutqarýshylar úiindilerdi arshyp jatyr. Kozitskiidiń aitýynsha, úiindi astynda adamdar bar.
Al Dnepropetrovsk oblysynyń jetekshisi Sergei Lysak túngi soqqylardan keiin bir adam opat bolyp, eki adam zardap shekkenin jetkizdi.
BBC-diń Orys qyzmetiniń habarlaýynsha, orys áskeriniń atqylaýy keminde alty saǵatqa jalǵasqan. Qanatty, ballistikalyq zymyrandar ushyrylǵan, irandyq Shahed 136 dronymen de soqqy jasalǵan.
Harkovte jergilikti bilik energetika nysandary búlingenin habarlady. Harkov oblysynyń áskeri ákimshiliginiń jetekshisi Oleg Sinegýbovtyń aitýynsha, Resei áskeri Harkov pen mańyndaǵy aýmaqqa shamamen 15 soqqy jasaǵan. Ázirge tolyq emes málimet boiynsha, turǵyn úige de raketa túsken. Zardap shekkender týraly aqparat joq.
Kiev meri Vitalii Klichko Goloseev jáne Sviatoshink aýdandarynda keminde úsh jarylys bolyp, eki adam zardap shekkenin habarlady.
Odessa oblysy áskeri ákimshiliginiń jetekshisi Maksim Marchenko Resei atqylaýy kezinde turǵyn úiler men energetika nysandary búlingenin aitty.
Jergilikti BAQ-tyń jazýynsha, Nikolaev, Jitomir, Ivano-Frankovsk, Hmelnitskii, Ternopol oblystarynda da jarylys estilgen. Kóp aimaqta áýe shabýylynan qorǵaityn júieler iske qosylǵan. Birqatar oblysta jaryq sóndirilgen.
"Energoatom" orys áskeri soqqysynyń saldarynan Zaporoje AES-i tutas isten shyqqanyn málimdedi. "Ýkraina temirjoly" kompaniiasy keminde 15 poiyz keshikkenin habarlady.
Resei qorǵanys ministrligi ázirshe 9 naýryz kúngi zymyran shabýyldaryna qatysty túsinikteme bermedi. Jalpy, Resei biligi Ýkrainanyń azamattyq nysandaryna shabýyldaǵanyn moiyndamai keledi.
Buǵan deiin Resei áskeri Ýkrainany 16 aqpanda zymyranmen jappai atqylaǵan. Sol kezde Ýkraina áskeri-áýe kúshterine súiengen keibir BAQ reseilik ushaqtar men kemeler 32 qanatty raketa ushyrǵanyn, 14-i atyp túsirilgenin habarlaǵan.
