Ortalyq referendým komissiiasy respýblikalyq referendým qorytyndysyn jariialady, - dep habarlaidy Tengrinews.kz.
OSK málimetinshe, sailaý quqyǵy bar 11 734 642 azamattyń 7 985 769-y daýys bergen. Referendýmǵa daýys berýshilerdiń 68,05 paiyzy qatysty.
Onyń ishinde azamattardyń 77,18 paiyzy (6 163 516 adam) Konstitýtsiiaǵa engizletin túzetýlerdi qoldap daýys bergen. Túzetýlerge qarsy bolǵandar - 18,66 paiyz (1 490 470 adam). Biýlletenderdiń 2,58 paiyzy jaramsyz dep tanylǵan. Daýystardy sanaý kezinde biýlletenderdiń 1,58 paiyzy esepke alynǵan joq.
"Osylaisha, referendým ótti dep tanylady. Respýblikalyq referendýmda Konstitýtsiiaǵa engizilgen túzetýler men tolyqtyrýlar, eger oblystar, respýblikalyq mańyzy bar qalalar jáne astananyń keminde úshten ekisinde daýys berýge qatysqan azamattardyń jartysynan astamy daýys berse, qabyldandy dep esepteledi.
Referendýmda qabyldanǵan sheshim mindetti sanalady jáne aktilermen qosymsha rastaýdy talap etpeidi. Referendýmda qabyldanǵan Konstitýtsiiaǵa engizilgen túzetýler men tolyqtyrýlar referendýmnyń qorytyndylary týraly resmi esep jariialanǵan kúnnen bastap kúshine enedi", - dedi Ortalyq referendým komissiiasynyń basshysy Nurlan Ábdirov.
Eske salaiyq, 5 maýsymda tańǵy 07.00 men 20.00 aralyǵynda Konstitýtsiialyq túzetýlerge bailanysty referendým ótti.
Referendýmda qazaqstandyqtar Konstitýtsiiadaǵy túzetýlerdiń bolý ne bolmaýyna daýys berdi. Iaǵni biýlletende tek bir suraq: "Qazaqstan Respýblikasynyń Konstitýtsiiasyna ózgerister men tolyqtyrýlar engizý týraly" zań jobasynda baiandalǵan Qazaqstan Respýblikasynyń Konstitýtsiiasyna ózgerister men tolyqtyrýlardy qabyldaisyz ba?". Suraqqa "iá" ne "joq" dep jaýap berýi kerek boldy.
