Almatyda «Real Madrid» klýbyna barýǵa úmitker jas fýtbolshylar arasyndaǵy jarys aiaqtaldy. Bas júldeni tarazdyq «Tulpar» komandasy utyp aldy, dep habarlaidy "Ult aqparat".
Jeńimpaz balalar úileriniń oiynshylarynan jasaqtalǵan 12 komandanyń arasynan anyqtalady. Úsh kúnge sozylǵan tartysty dodada Tarazdyq «Tulpar» komandasy ozyq shyqty. Finalda olar Rýdnyi qalasynyń «Berkýt» komandasymen oinap, 1-0 esebimen jeńdi.
«Biz qatty qýanyp turmyz. Bul jeńisti biz kóp armandadyq, komandamyzben bar kúshimizdi saldyq. Biz barlyq bala armandaityn «Real Madrid» fýtbol klýby men ataqty «Santiago Barnabeo» stadionyn kóremiz. Almatyǵa Qazaqstannyń túkpir-túkpirinen kelgen fýtbolshylarǵa sáttilik tileimin. Barlyq komanda myqty boldy», - deidi «Tulpar» komandasynyń oiynshysy Temirlan Donilko.
Qazaqstandaǵy balalar úiiniń jetkinshekteri arasyndaǵy «Armanyńa jaqynda» atty fýtbol oiyny «BAURZHAN» qaiyrymdylyq qory, Qazaqstan fýtbol Federatsiiasy, QR BǴM balalardyń quqyqtaryn qorǵaý komitetiniń uiymdastyrýymen ótti.
«Týrnir ótkizilgen jeti jyldyń ishinde balalar úiiniń 60 shaqty balasy ispandyq «Barselona», italiialyq «Milan», nemistiń «Bavariiasy» men frantsýzdyń «Pari Sen-Jermeni» sekildi azýly fýtbol klýbtarynda bolypty. Biylǵy jarystyń jeńimpazdary áigili «Real Madridke» baryp, jattyǵýyn kórmek»,- dep atap ótti BAURZHAN» qaiyrymdylyq qorynyń joba jetekshisi Baljan Tursyn.
Jobanyń bas demeýshisi «Samruk Kazyna Trust» áleýmettik jobalardy damytý qory. Jeńimpaz komandany Ispaniia eline aparyp, alyp kelýdi osy qor óz moinyna aldy.
«Biz mundai jobalardy únemi qoldap otyramyz. Bul jobanyń ereksheligi — munda balalardyń armanyn oryndaý, olardy qýantý, sportqa degen qyzyǵýshylyqtaryn arttyrý. Dál osy balalardyń arasynan erteń, myqty sportshy shyǵýy múmkin. Sondyqtan bizdiń qor qýana-qýana barlyq shyǵyndy kóterip alady. Men jeńimpaz komandany shyn júrekten quttyqtaimyn. Bul sport, munda bir-aq jeńimpaz bolýy kerek. Desekte, barlyq komandaǵa arnaiy syilyǵymyz bar», - dedi «Samruk Kazyna Trust» áleýmettik jobalardy damytý qorynyń bas menedjeri.
Qazan aiynyń sońynda, jeńimpaz komanda Ispaniiaǵa attanyp, armanymen qaýyshady.
