Nur-Sultan qalasynyń bas memlekettik sanitarlyq dárigeri Sarhat Beisenova Ramazan aiynda aýyzashardy tek otbasy ortasynda ótkizýge shaqyrdy, dep habarlaidy QazAqparat.
«Qurmetti elorda turǵyndarymen qonaqtary! Bizdiń qoǵam úshin mańyzdy dini mereke – qasietti Ramazan aiy jaqyndap keledi. Bul elimizdiń kóptegen azamattary úshin úlken mańyzǵa ie. Qalanyń barlyq azamattaryn mereke kúnderi túsinistikpen qarap, karantin rejimin qatań saqtaýdy suraimyz. Biz dindar adamdardyń rýhani jáne dini sezimderine tereń qurmetpen qaraimyz. Alaida, qaýipti virýstyń aýyr pandemiiasy barlyǵynyń densaýlyǵyna qaýip tóndiredi», - dedi ol elorda ákimdiginde ótken baspasóz máslihaty barysynda.
Sarhat Beisenova osyǵan bailanysty Nur-Sultan qalasynyń sanitarlyq-epidemiologiialyq baqylaý departamenti shekteý sipatyndaǵy barlyq is-sharany eskerýdi jáne saqtaýdy, atap aitqanda, ujymdyq is-sharalardy, onyń ishinde úi jaǵdaiynda ótkizbeýdi usynatyndyǵyn basa aitty.
«Sonymen qatar qonaqasy nemese birge ýaqyt ótkizý úshin kelgisi keletin otbasy músheleri men dostaryna da kelýge jol bermeý kerek. 65 jastan asqan adamdar táýekel tobynda qalady. Osyǵan bailanysty qasietti Ramazan aiynda aýyzashardy tek otbasy ortasynda ótkizýdi usynamyz. Pandemiia kezinde áleýmettik araqashyqtyq saqtaý óte mańyzdy ekenin umytpańyzdar. Sondyqtan biz barlyq usynystardy oryndaýǵa jáne pandemiia men kúreste jaýapkershilik pen birlikti kórsetýge shaqyramyz», - dedi elordanyń bas sanitar dárigeri.
