Foto: Astana qalasy ákimdiginiń Halyqty jumyspen qamtý ortalyǵy» KMM
Qańtar oqiǵasynan keiin raqymshylyqqa ilingen 461 azamat jumysqa ornalastyryldy. Bul týraly Májilistiń jalpy otyrysynda QR Premer-Ministriniń orynbasary Altai Kólginov aitty, dep habarlaidy QazAqparat agenttigi.
«Qazaqstan Respýblikasy boiynsha raqymshylyq jariialanǵan adamdardyń sany – 1095. Búgingi tańda 461-i jumysqa ornalasty. Qalǵan azamattar boiynsha jumys jalǵasyp jatyr», - dedi vitse-premer Májilis depýtattarynyń saýalyna orai.
Sonymen qatar ol jastarǵa qatysty memleket tarapynan keshendi is-sharalar qabyldanyp jatqanyn atap ótti.
Máselen, 2022 jyly «Memlekettik jastar saiasaty týraly» zań qabyldandy.
Atalǵan zań aiasynda jastar jasy 29-dan 35-ke deiin ulǵaityldy. Nátijesinde buryn jastar sanatyna 3 mln 700 myń adam kirse, qazir olardyń sany 5 mln 700 adamdy qurady.
NEET sanatyndaǵy jastardyń memlekettik qoldaý alýyna múmkindik jasaldy. Jastar tájiribesi 1 jylǵa uzartylyp, jalaqy 100 myń teńge bolyp belgilendi.
«Qańtar oqiǵasy kezinde Almaty qalasy qatty zardap shekti. Qala ákimdigimen arnaiy jastar úshin keshendi jospar qabyldandy. Jospardy jastardy oqytý, jumyssyz jastardy jumysqa ornalastrý, biliktiligin arttyrý jáne baspanamen qamtý kózdelgen. Osyndai jospar barlyq óńirde qabyldandy. Jastarǵa qatysty jyl saiyn júieli jumys atqarylady. Ol - Úkimettiń baqylaýynda», - dedi Altai Kólginov.
