«Talap» qoldanbaly zertteýler ortalyǵy qoǵamdyq qorynyń prezidenti Rahym Oshaqbaev eldegi karantin sharalarynyń kúsheiýine qatysty pikir bildirdi, dep habarlaidy QazAqparat.
QazAqparat tilshisine telefon arqyly bergen pikirinde Rahym Oshaqbaev eldegi eń iri eki qalada epidemiologiialyq jaǵdaidyń ýshyǵa bastaǵanyna alańdaitynyn aitty.
«Almaty men Nur-Sultanda, basqa óńirlerde de koronavirýsqa bailanysty jaǵdai áli de alańdatarlyq bolyp otyr. Árine, karantin shekteýlerin kúsheitý ázirge bilik arsenalyndaǵy jalǵyz jaýap bolyp qala beredi», - deidi Rahym Oshaqbaev.
Sarapshy, sonymen qatar, jetildirýdi qajet etetin keibir máseleler týraly aitty.
«Jalpy alǵanda, pandemiia jariialanǵanyna bir jyldan asty. Osy ýaqyt ishinde, menińshe, sharalarǵa jurttyń qatysýyn retteitin naqty qaýlylar daiyndaýǵa bolatyn edi. Áli kúnge deiin «Ashyq» qosymshasyn pilottyq rejimde paidalanyp júrmiz. QR-kodtardy paidalanyp jatqan eshkim joq. Ruqsat etý jaǵy da rettelmegen. Baqylaýshylar bul iste áli de bolsa belgili bir qarama-qaishylyqtar bar ekenin aityp júr. Saýda ortalyqtary men meiramhanalar jabylǵanymen, basqa jaqta infektsiia taratý qaýpi joǵary, adam kóp jinalatyn oryndar eskerýsiz qalýy múmkin. Osynyń bárine vaktsinalaý naýqanynyń alǵash jariialanǵan kólemder men qarqynnan edáýir keshigýi negizgi tejeýish bolyp tur. Ókinishke qarai, jappai ekpe salynǵansha osyndai túsiniksiz rejimde ómir súremiz. Bul óte jaman, qarapaiym halyqqa da, bizneske de úlken ziian keltiredi», - deidi Rahym Oshaqbaev.
