«Talap» qoldanbaly zertteýler ortalyǵynyń direktory, Ulttyq qoǵamdyq senim keńesiniń múshesi Rahym Oshaqbaev úkimettik emes uiymdardyń (ÚEU) qyzmetine qatysty pikir bildirdi, dep habarlaidy QazAqparat.
«Búgin úkimettik emes uiymdardyń ókilderi ózderiniń kásibi merekesin atap ótip jatyr. Jalpy, Qazaqstanda birazdan beri úkimettik emes uiymdardy yntalandyrý boiynsha maǵynaly ári tiimdi saiasat iske asyrylyp keledi. Qazaqstan Azamattyq aliansy túrinde institýtsionaldy orta bar. Jalpy, bul salada tiisti qarjy bólinip, granttyq tetik jetildirilip jatyr. Osynyń nátijesinde aýqymdy túrde óńirlerge taralǵan azamattyq qoǵam sektoryn kórip otyrmyz. Olar qoǵamdyq-saiasi ómirge, zańnamany jetildirýge, áleýmettik problemalardy sheshýge qatysty óziniń eleýli úlesin qosyp keledi», - dedi R. Oshaqbaev Aqparat jáne qoǵamdyq damý ministriniń úkimettik emes uiym ókilderimen kezdesýinen keiin.
Sonymen qatar ol búgin ministrmen kezdesý barysynda ÚEU ókilderi qai máselelerdi kótergenin aitty.
R. Oshaqbaevtyń aitýynsha, biyl Azamattyq forým ótýi tiis.
«Kezdesýde dástúrli ári otbasylyq qundylyqtarǵa erekshe mán berildi. Sonymen qatar, úkimettik emes uiym róli óńirlerde, aýyldyq jerlerdegi adamdardy qoldaýǵa jáne bilim berý salasyna baǵyttalýy kerektigi aityldy. Biz osy jyly aýqymdy Azamattyq forým ótedi dep úmittenemiz. Onda ÚEU-lar júrgizgen eleýli jumysqa qorytyndy jasap, bolashaqqa josparlardy belgileimiz», - dedi ol.
