Abai oblysynda 20 jastaǵy Dilnaz Jumaǵulovany óltirdi degen kúdikpen onyń burynǵy jigiti qamaýǵa alynǵan. Marqumnyń ata-anasy qylmystyń asa qatygezdikpen jasalǵanyn aityp, isti aýyr bap boiynsha qaita saralaýdy jáne kinálige eń qatań jaza taǵaiyndalýyn talap etip otyr, dep habarlaidy ult.kz.
KTK arnasynyń málimetinshe, Dilnaz – otbasyndaǵy jalǵyz perzent. Semeidegi Shákárim ýniversitetiniń ekinshi kýrsynda tarih jáne geografiia mamandyǵynda bilim alǵan. Káris jáne aǵylshyn tilderin meńgergen boijetkenniń ómiri 13 shildede úzilgen.
Sol kúni Dilnaz qurdastarymen kezdesip, aýyl ishinde serýendeýdi josparlaǵan. Alaida dostary úiden shyqpai qalǵan. Kelesi kúni tańerteń boijetkenniń denesi kósheden tabylǵan.
Marqumnyń ákesi Sabyrjan Temirhannyń aitýynsha, qyzynyń denesinen birneshe pyshaq jaraqaty anyqtalǵan. Onyń sózinshe, boijetkenniń basynan da aýyr jaraqat alǵany saraptama kezinde belgili bolǵan.
«Sodan keiin tastaǵan. Ústindegi kýrtkasyn sheship alǵan. Sonyń bárin alyp, myna jaqtaǵy ormanǵa aparyp, telefony men kýrtkasyn tyǵyp tastaǵan», – deidi Dilnazdyń ákesi.
Qylmysqa kúdikti retinde 20 jastaǵy burynǵy jigiti ustalǵan. Ol Dilnazben Borodýliha aýylyndaǵy mektepterdiń birinde qatarlas synypta oqyǵan.
Marqumnyń anasy Dinara Ataevanyń aitýynsha, qyzy buǵan deiin jigitpen qarym-qatynasyn toqtatqanyn aitqan. Alaida olardyń biyl jazda qaita aralasa bastaǵanyn tanystary jetkizgen.
«Qyzym ol jigitpen qarym-qatynasyn toqtatqanyn aitqan edi. Ekeýiniń arasynda qandai janjal bolǵanyn bilmeimin», – deidi anasy.
Otbasy bul istiń asa qatygezdikpen jasalǵanyna senimdi. Sondyqtan ata-ana qylmystyq isti QR Qylmystyq kodeksiniń 99-baby 2-bóligi boiynsha qaita saralaýdy talap etip otyr.
«Biz kináli adamnyń barynsha aýyr jaza alǵanyn talap etemiz. Ol zań talabyna sai tolyq jazalanýy kerek. Qazir is Qylmystyq kodekstiń 99-baby 1-bóligi boiynsha tergelip jatyr. Bul – asa qatygezdikpen jasalǵan qylmys. Sondyqtan 99-baptyń 2-bóligi boiynsha saralanýǵa tiis», – deidi Dinara Ataeva.
Ata-ananyń aitýynsha, kúdiktiniń qylmysqa qatysy bar zattary da tabylǵan. Qazir otbasynyń zańgeri birneshe tomnan turatyn qylmystyq is materialdaryn zerdelep jatyr.
Abai oblysy politsiia departamentiniń málimetinshe, kúdikti ustalyp, ýaqytsha ustaý izoliatoryna qamalǵan. Sotqa deiingi tergeý aiaqtalǵan. Qazir protseske qatysýshylar qylmystyq is materialdarymen tanysyp jatyr.
«Tanysý aiaqtalǵannan keiin qylmystyq is zańnamada belgilengen tártippen sotqa joldanady», – dedi Abai oblysy PD Tergeý basqarmasy bastyǵynyń orynbasary Erjan Teljanov.
Endi Dilnazdyń ata-anasy sottan istiń barlyq mán-jaiyn jan-jaqty qarap, kináli adamǵa zań aiasynda eń qatań jaza taǵaiyndaýdy surap otyr.
