Qazaqstan azamaty Aqjarqyn Turlybaidyń Qytaida qamaýda otyrǵanyna on jyldan asty. Ol 2014 jyly Gýanchjoý áýejaiynda ustalyp, júginen esirtki tabylǵannan keiin ómir boiyna bas bostandyǵynan aiyrylǵan bolatyn. Osy ýaqyt ishinde onyń isi qoǵam nazarynan túsken emes, dep habarlaidy ult.kz.
Qytaida qalai ustaldy?
Kznews.kz saitynyń jazýynsha, Aqjarqyn Turlybai 1994 jyly Túrkistan oblysy, Maqtaaral aýdanynda dúniege kelgen. Mektepti támamdaǵan soń Almatydaǵy pedagogikalyq joǵary oqý ornyna túsip, stýdent kezinde Qytaidan kiim tasyp satýmen ainalysqan tanystarynyń yqpalymen bul kásipke qyzyǵýshylyq tanytady.
2014 jyldyń naýryzynda ol alǵash ret Qytaiǵa barǵan. Biraz ýaqyttan keiin jaqyndarymen bailanysy úzilgen. Keiin onyń Gýanchjoý halyqaralyq áýejaiynda ustalǵany belgili boldy.
Tergeý materialdaryna sáikes, keden qyzmetkerleri Aqjarqyn alyp júrgen chemodannan shamamen 4,5 keli amfetamin tárkilegen. Osydan keiin oǵan esirtki kontrabandasy boiynsha aiyp taǵyldy.
Qorǵaýshylar ne deidi?
Qytai soty qazaqstandyq azamatty ómir boiyna bas bostandyǵynan aiyrý jazasyna kesti. Alaida Aqjarqyn ózine taǵylǵan aiypty eshqashan moiyndaǵan emes.
Qorǵaýshy taraptyń málimetinshe, Nigeriia azamaty Adindý Nonso Fortýna odan Malaiziiaǵa áielder kiimi salynǵan chemodandy jetkizip berýdi ótingen. Advokattardyń pikirinshe, Aqjarqyn júktiń ishinde esirtki bolǵanyn bilmegen jáne halyqaralyq esirtki tobynyń qurbany bolýy múmkin.
Onyń advokaty Suńqar Nurmaǵambetov ta birneshe márte stýdenttiń aldanǵanyn aityp, isti qaita qaraý qajettigin kótergen.
Aqjarqyndy Qazaqstanǵa qaitarý múmkin be?
Aqjarqynnyń qamaýda otyrǵan jyldary onyń otbasy da aýyr kezeńdi bastan ótkerdi. Anasynyń aitýynsha, qyzyn qorǵaý úshin qajetti shyǵyndardy óteý maqsatynda otbasy qolyndaǵy múlkin satýǵa májbúr bolǵan.
Túrmede júrgen jyldary Aqjarqyn qytai tilin meńgerip, ioga jáne aǵylshyn tili boiynsha sabaqtar ótkizgeni týraly aqparat taraǵan.
Qazaqstan biligi men diplomatiialyq ókildikteri ony elge qaitarý máselesin birneshe ret kóterdi. Degenmen Qytai tarapy ómir boiyna sottalǵan azamatty Qazaqstanǵa berý máselesine ázirge kelisim bergen joq. Sondyqtan Aqjarqyn Turlybaidyń taǵdyry áli de eki el arasyndaǵy quqyqtyq jáne diplomatiialyq kelissózderdiń kún tártibinde qalyp otyr.
