2026 jylǵy Quryltai depýtattaryn sailaý barysynda ákimshilik quqyq buzýshylyqtyń eki quramy boiynsha 15 derek anyqtalǵan. Bul 2023 jylǵy sailaýmen salystyrǵanda birneshe ese az, dep habarlaidy ult.kz Bas prokýratýraǵa silteme jasap.
Prokýratýra málimetinshe, sailaý naýqanynyń barlyq kezeńinde zańdylyqtyń saqtalýyna baqylaý júrgizilgen. Kandidattardy usyný men tirkeý, úgit júrgizý jáne daýys berý protsesteri zań talaptaryna sáikes ótken.
Anyqtalǵan 15 zańbuzýshylyqtyń:
- 3-eýi – zańsyz saýal salý;
- 12-si – úgit júrgizýge tyiym salynǵan kezeńde úgit júrgizý faktileri.
Sonymen qatar sailaý komissiialary tarapynan biýlletenderdi zańsyz berý, basqa adamdar úshin daýys berý nemese biýlletenderdi tastaý siiaqty faktiler tirkelmegen.
Akkredittelgen baiqaýshylar men BAQ ókilderimen janjaldar, olardy sailaý ýchaskelerinen shyǵarý jáne qoǵamdyq tártipti óreskel buzý jaǵdailary da bolmaǵan.
Salystyrý úshin: 2023 jylǵy sailaý kezinde sailaý zańnamasyn buzýdyń 69 faktisi anyqtalǵan. Ol kezde ákimshilik quqyq buzýshylyqtyń 8 quramy boiynsha ister tirkelgen.
Biylǵy sailaý kezeńinde prokýrorlarǵa 12 ótinish túsken. Olardyń barlyǵy partiialyq tizimderdi tirkeý jáne úgit júrgizý máselelerine qatysty bolǵan. Ótinishterdiń árqaisysyna túsindirme sipatyndaǵy jaýap berilgen.
Al 2023 jylǵy Májilis sailaýy kezinde prokýratýra organdary 113 ótinish pen shaǵymdy qaraǵan. Bul biylǵy kórsetkishten shamamen 9 ese kóp.
Sondai-aq 2023 jyly Májilis depýtattyǵyna kandidattar sottarǵa 82 talap aryz bergen. Al biyl partiialyq tizimderge engizilgen kandidattardyń sotqa júginý faktisi tirkelmegen.
Bas prokýratýra bul kórsetkishter sailaý protsesine qatysýshylardyń quqyqtyq mádenieti artqanyn jáne sailaý barysynda túsindirý ári profilaktikalyq jumystardyń tiimdi bolǵanyn kórsetetinin atap ótti.
