«Qazgidromet» RMK elimizdiń birneshe óńirine qatysty daýyldy eskertý jariialady. Sinoptikterdiń boljamynsha, 27 shildeden bastap respýblikanyń basym bóliginde aptap ystyq saqtalyp, kei jerlerde aýa temperatýrasy +47 gradýsqa deiin kóteriledi, dep habarlaidy ult.kz.
Meteorologtardyń málimetinshe, 27-30 shilde aralyǵynda Batys Qazaqstan men Atyraý oblystarynda, 27 shilde men 1 tamyz aralyǵynda Mańǵystaý oblysynda qatty jáne óte qatty ystyq saqtalady. Sonymen qatar 27-31 shilde kúnderi Qostanai, Aqtóbe jáne Ulytaý oblystarynda da óte ystyq aýa raiy kútiledi.
Soltústik Qazaqstan jáne Aqmola oblystarynda 27 shilde men 1 tamyz aralyǵynda, al Qyzylorda men Túrkistan oblystarynda 26 shilde men 2 tamyz aralyǵynda qatty ystyq bolady. Osyǵan bailanysty atalǵan óńirlerdiń basym bóliginde joǵary jáne tótenshe órt qaýpi saqtalady.
Eń joǵary temperatýra Mańǵystaý oblysynda tirkelmek. 27 shildede óńirde kúndiz aýa temperatýrasy +43…+47 gradýsqa deiin kóteriledi. Sondai-aq Batys Qazaqstan, Atyraý jáne Aqtóbe oblystarynda +40…+43 gradýsqa deiin óte qatty ystyq kútiledi. Qostanai oblysynyń ońtústiginde +41 gradýsqa deiin ystyq bolsa, Túrkistan oblysynda +40…+41 gradýs, Qyzylorda oblysynda +40…+42 gradýsqa deiin jetedi.
Jeldiń kúsheiýi men shańdy daýyl da birqatar óńirde boljanyp otyr. Mańǵystaý oblysynyń soltústigi men ortalyǵynda, Qyzylorda oblysynyń soltústigi, ortalyǵy jáne ońtústiginde, sondai-aq Túrkistan men Aqtóbe oblystarynyń kei aýmaqtarynda shańdy daýyl kútiledi. Jeldiń ekpini sekýndyna 15-25 metrge deiin jetýi múmkin.
Shyǵys Qazaqstan, Abai, Pavlodar, Qaraǵandy, Almaty, Jetisý jáne Jambyl oblystarynyń jekelegen aýdandarynda jańbyr jaýyp, naizaǵai oinaidy. Kei óńirlerde burshaq túsip, daýyl soǵýy yqtimal. Shyǵys Qazaqstan oblysynyń soltústigi men shyǵysynda qatty jańbyr jaýýy múmkin.
Sonymen qatar túngi jáne tańǵy ýaqytta Shyǵys Qazaqstan men Soltústik Qazaqstan oblystarynyń kei bólikterinde tuman kútiledi.
Sinoptikter Almaty qalasynda, sondai-aq Atyraý, Mańǵystaý, Ulytaý, Jetisý, Jambyl, Qyzylorda, Túrkistan jáne basqa da birneshe óńirde tótenshe órt qaýpi saqtalatynyn eskertti.
Mamandar turǵyndardy aptap ystyq kezinde kúnniń eń ystyq ýaqytynda syrtta uzaq júrmeýge, órt qaýipsizdigi talaptaryn qatań saqtaýǵa jáne daýyldy eskertýlerdi nazardan tys qaldyrmaýǵa shaqyrdy.
