Astanada Laos Prezidenti Thonglýn Sisýlitti resmi qarsy alý rásimi ótti. Ol Qazaqstanǵa alǵash ret memlekettik saparmen keldi, dep habarlaidy ult.kz.
Táýelsizdik saraiynda Laos Prezidentin Memleket basshysy Qasym-Jomart Toqaev qarsy aldy. Eki el basshylary resmi delegatsiia múshelerin tanystyryp, Qurmet qaraýylynyń raportyn qabyldady. Sodan keiin Qazaqstan men Laostyń memlekettik ánurandary oryndaldy.
Keiin Qasym-Jomart Toqaev pen Thonglýn Sisýlit shaǵyn quramda kelissóz júrgizdi.
Prezident Laos basshysynyń Qazaqstanǵa alǵashqy saparyn tarihi oqiǵa dep atady. Onyń aitýynsha, kelesi jyly Qazaqstan men Laos arasyndaǵy diplomatiialyq qatynastardyń ornaǵanyna 30 jyl tolady.
«Elderimizdiń qarym-qatynasy dostyq sipatqa ie. Eki memleket halyqaralyq arenada, eń aldymen, BUU aiasynda tyǵyz jumys istep otyr», – dedi Qasym-Jomart Toqaev.
Memleket basshysy Laosty Qazaqstannyń Ońtústik-Shyǵys Aziiadaǵy mańyzdy ári senimdi seriktesi dep sanaitynyn atap ótti. Sondai-aq Laos ekonomikasynyń sońǵy jyldary turaqty ósip kele jatqanyn aityp, energetika, aýyl sharýashylyǵy, ónerkásip jáne týrizm salalaryndaǵy jetistikterine toqtaldy.
Óz kezeginde Thonglýn Sisýlit Qazaqstanǵa saparmen kelýge shaqyrǵany úshin Qasym-Jomart Toqaevqa alǵys bildirdi.
Laos Prezidenti Qazaqstannyń damýyna jáne elde júrgizilip jatqan ózgeristerge joǵary baǵa berip, bul sapar ekijaqty qarym-qatynastardy damytýǵa eleýli úles qosatynyna senim bildirdi.
Kelissózder barysynda eki el arasyndaǵy yntymaqtastyqtyń perspektivti baǵyttary talqylanyp, aldaǵy ortaq jumystyń basymdyqtary aiqyndaldy.
