Qazaqstanda aldaǵy ákimshilik raqymshylyq aiasynda azamattar men jeke kásipkerlerdiń 300 million teńgege jýyq ákimshilik aiyppuly esepten shyǵarylýy múmkin. Bul týraly Memlekettik kirister komiteti málimdedi, dep habarlaidy ult.kz.
Komitettiń málimetinshe, raqymshylyq Qazaqstan azamattaryna, jeke kásipkerlerge, jeke notariýstarǵa, jeke sot oryndaýshylaryna, advokattar men zań konsýltanttaryna qatysty qoldanylady.
Al zańdy tulǵalarǵa, laýazymdy tulǵalarǵa, qandastarǵa, shetel azamattary men azamattyǵy joq adamdarǵa bul jeńildik berilmeidi. Sondai-aq sot taǵaiyndaǵan ákimshilik jazalar men azamattardyń jáne memlekettiń qaýipsizdigine qater tóndiretin quqyqbuzýshylyqtar raqymshylyqqa ilikpeidi.
Budan bólek, Memlekettik kirister organdary qaraityn birqatar salyqtyq quqyqbuzýshylyqtar da raqymshylyqtan tys qalady. Atap aitqanda, salyq salý obektilerin jasyrý, salyq tóleýden jaltarý jáne salyq somasyn ádeii tómendetýge qatysty ákimshilik quqyqbuzýshylyqtar keshirilmeidi. Komitet muny mundai áreketterdiń memleket ekonomikasyna eleýli zalal keltirýimen túsindirdi.
Vedomstvo sondai-aq biyl mikro jáne shaǵyn bizneske arnalǵan shartty «taza paraq» tetiginiń nátijesin jariialady. Sonyń arqasynda 19 myń kásipker negizgi salyq bereshegin 13 mlrd teńgege ótep, 4,4 mlrd teńge ósimpul men 4,9 mlrd teńge aiyppuldan bosatylǵan.
Qarjy ministrliginiń aldyn ala esebine sáikes, jańa ákimshilik raqymshylyq 2 370 adamǵa qatysty bolýy múmkin. Onyń ishinde 448 jeke tulǵanyń 72,7 million teńge, al 1 930 jeke kásipkerdiń 225,6 million teńge kólemindegi aiyppuly esepten shyǵarylýy yqtimal.
Komitet naqty kórsetkishter zań qabyldanyp, kúshine engennen keiin belgili bolatynyn atap ótti.
Aita keteiik, Qazaqstan táýelsizdik tarihynda alǵash ret ákimshilik raqymshylyq engizilmek. Buǵan deiin Ishki ister ministrligi óz quzyreti boiynsha ǵana qazaqstandyqtardyń 17 milliard teńgeden astam aiyppuly keshiriletinin habarlaǵan edi. Jalpy ákimshilik raqymshylyq 15 memlekettik organnyń qaraýyna jatatyn Ákimshilik quqyq buzýshylyq týraly kodekstiń 263 babyn qamtidy.
