Qazaqstandyq shahmatshylar BAÁ-de ótken 32-shi Abu Dhabi International Chess Festival halyqaralyq shahmat festivalinde eki medal jeńip aldy. Ashyq blits-týrnirde grossmeister Edgar Mamedov kúmis júldeger atansa, grossmeister Aldiiar Ansat qola júldege ie boldy, dep habarlaidy ult.kz.
Qazaqstan shahmat federatsiiasynyń baspasóz qyzmetiniń málimetinshe, 16 jastaǵy Edgar Mamedov múmkin 11 upaidyń 9,5-in jinap, ekinshi oryndy ielendi. 18 jastaǵy Aldiiar Ansat 9 upaimen úshinshi orynǵa turaqtady. Blits-týrnirdiń jeńimpazy 10 upai jinaǵan halyqaralyq master Aleksandr Ýsov boldy.
Qazaqstandyqtar festivaldiń basty týrniri – Masters-te de sátti óner kórsetti. Oǵan 22 elden 109 sportshy qatysty, onyń ishinde 17 grossmeister (GM), 32 halyqaralyq master (IM) jáne 5 áielder grossmeisteri (WGM) boldy. Qazaqstan ókilderiniń ishindegi eń jaqsy nátijeni halyqaralyq master Daniial Sapenov kórsetip, altynshy oryndy aldy.
Toǵyz týr qorytyndysy boiynsha 17 jastaǵy Daniial Sapenov 6,5 upai jinady – bul ekinshiden besinshi orynǵa deiingi shahmatshylarmen birdei. Qorytyndy oryndar qosymsha kórsetkishter boiynsha bólindi. Masters týrniriniń jeńimpazy 7 upaimen Ózbekstan ókili Jahongir Vahidov atandy. Ekinshi oryndy Daniil Dýbov, úshinshi oryndy Aleksandr Rahmanov ielendi.
Ondyqqa qazaqstandyq grossmeister Edgar Mamedov ta endi. Ol 6 upai jinap, 10-oryndy aldy. Aldiiar Ansat ta osyndai upaimen týrnirdi 14-orynda aiaqtady.
32nd Abu Dhabi International Chess Festival BAÁ astanasy Abý-Dabide 15–24 tamyz aralyǵynda ótti.
