Qazaqstanda zeinetaqy júiesin jańǵyrtýǵa qatysty birneshe jańa usynys talqylanyp jatyr, dep habarlaidy ult.kz.
Bul másele Eńbek jáne halyqty áleýmettik qorǵaý ministri Asqarbek Ertaevtyń tóraǵalyǵymen ótken arnaiy jumys tobynyń otyrysynda qaraldy.
Jiynda talqyǵa túsken negizgi bastamalardyń biri – Singapýrdyń zeinetaqy modeline uqsas júie. Usynysqa sáikes, azamattardyń mindetti zeinetaqy jarnalary birneshe maqsatqa bólinip jinalady. Sonyń nátijesinde adamdar zeinet jasyna jetpei-aq jinaqtarynyń bir bóligin baspana satyp alýǵa, bilim alýǵa, emdelýge nemese investitsiia jasaýǵa paidalana alady. Jinaq úsh shotqa bólinip, olardyń biri turǵyn úi máselesin sheshýge arnalǵan jeńildetilgen tetik retinde qarastyrylǵan.
Alaida sarapshylar bul modeldiń áleýmettik osal toptardyń, sonyń ishinde múgedektigi bar azamattar men erekshe qajettiligi bar bala tárbielep otyrǵan ata-analardyń múddelerin qanshalyqty qorǵaitynyna qatysty suraqtar kóterdi. Sondyqtan bul baǵyttaǵy yqtimal ózgeristerdi jan-jaqty zerdeleý qajettigi aityldy.
Otyrysta budan ózge de balama tásilder tanystyryldy. Memlekettik áleýmettik saqtandyrý qory azamattyń tabysy men áleýmettik saqtandyrý júiesine qatysý merzimine bailanysty esepteletin áleýmettik zeinetaqy tólemin engizýdi usyndy. Bul bastama zeinetaqy júiesindegi áleýmettik qoldaýdy kúsheitýge baǵyttalǵan.
Al Biryńǵai jinaqtaýshy zeinetaqy qory jumys berýshiniń mindetti aýdarymdarynyń 4 paiyzyn azamattyń jeke zeinetaqy shotyna, al 1 paiyzyn ortaq saqtandyrý quramdasyna baǵyttaý modelin usyndy. Bul tásil jinaqtaýshy jáne saqtandyrý qaǵidattaryn biriktirip, ómir boiy tólenetin zeinetaqy júiesin qalyptastyrýǵa múmkindik beredi.
Eńbek jáne halyqty áleýmettik qorǵaý ministrligi atalǵan usynystardyń ázirge talqylaý jáne saraptaý kezeńinde ekenin atap ótti. Iaǵni, bul ózgerister áli qabyldanǵan joq. Túpkilikti sheshimder usynystardyń áleýmettik ádilettilikke, qarjylyq turaqtylyqqa jáne halyqtyń ártúrli sanatyna yqpaly jan-jaqty baǵalanǵannan keiin ǵana qabyldanady.
