Qazaqstanda 2026 jyldyń basyndaǵy jaǵdai boiynsha 0-17 jas aralyǵyndaǵy 6,9 million bala turady. Bul el halqynyń jalpy sanynyń 33,6 paiyzyn quraidy, dep habarlaidy ult.kz.
Ulttyq statistika biýrosynyń málimetinshe, balalardyń basym bóligi qalada turady. Atap aitqanda, olardyń 62,3 paiyzy qalalyq jerlerde, al 37,7 paiyzy aýyldyq eldi mekenderde ómir súredi.
Genderlik quram boiynsha ul balalardyń úlesi 51,4 paiyz bolsa, qyz balalardyń úlesi 48,6 paiyzdy quraidy.
Statistikaǵa sáikes, balalar sany eń kóp óńirler qatarynda Túrkistan oblysy kósh bastap tur. Óńirde 910,4 myń bala turady, bul respýblikadaǵy barlyq balalardyń 13,2 paiyzyna teń. Ekinshi orynda 688,9 myń balamen Almaty qalasy (10%), al úshinshi orynda 572,3 myń balamen Almaty oblysy (8,3%) ornalasqan.
Ulttyq statistika biýrosy sońǵy bes jylda Qazaqstandaǵy balalar sany 4,4 paiyzǵa artqanyn atap ótti.
1 maýsym – Halyqaralyq balalardy qorǵaý kúnine orai jariialanǵan málimetter elimizde árbir úshinshi turǵynnyń bala ekenin kórsetip otyr. Sarapshylardyń pikirinshe, bul kórsetkish bilim berý, densaýlyq saqtaý jáne áleýmettik qoldaý júielerin damytýdaǵy jaýapkershiliktiń mańyzyn arttyra túsedi.
