Qazaqstanda biznesti nesieleýdiń birneshe jylǵa sozylǵan tómendeý úrdisi toqtap, bankter ekonomikany belsendi qarjylandyrýǵa qaita kóshti. Bul týraly Qarjy naryǵyn retteý jáne damytý agenttiginiń tóraǵasy Mádina Ábilqasymova málimdedi, dep habarlaidy ult.kz.
Onyń aitýynsha, 2017–2020 jyldary naqty sektordy nesieleý 16,1%-ǵa qysqarǵan. Al 2021 jyldan bastap turaqty ósim baiqalǵan.
"2021–2025 jyldary bizneske berilgen kreditter jyl saiyn orta eseppen 15,3%-ǵa ósti. 2020 jyldan bastap olardyń kólemi 2 eseden astam 16,1 trln teńgege deiin ósti, al qaryz alýshy kásipkerler sany 57 myńnan 597 myńǵa deiin ósti", - deidi Madina Ábilqasymova.
Bankterge iri jobalardy qarjylandyrýǵa múmkindik keńeidi
Mádina Ábilqasymovanyń aitýynsha, bankterdiń iri investitsiialyq jobalardy qarjylandyrý múmkindigi de keńeitilgen.
Shaǵyn jáne orta bizneske beriletin nesieler men sindikattyq qaryzdardyń táýekel salmaǵy 50%-ǵa deiin tómendetildi. Sonymen qatar ShOB-ty kepildendirý qory qurylyp, sindikattyq nesieleýdiń quqyqtyq bazasy qalyptastyryldy.
«Báiterek» holdingimen birlesip jalpy quny 10,7 trln teńge bolatyn investitsiialyq jobalar pýly jasaqtalǵan. Onyń ishinde quny 2,5 trln teńge bolatyn toǵyz joba maquldanǵan.
Endigi mindet — bankterdiń investitsiialyq jobalarǵa qatysýyn keńeitip, memlekettik tikelei qarjylandyrýdan jeke banktik kapitaldy tartýǵa birtindep kóshý.
Ábilqasymovanyń aitýynsha, bank sektory saýyqtyrý kezeńinen ótip, turaqtylyqtyń aitarlyqtai qoryn qalyptastyrǵan. Endigi maqsat — bul resýrsty biznesti, jeke investitsiialardy jáne ekonomikalyq ósimdi qarjylandyrýǵa kóbirek baǵyttaý.
