Qazaqstan biligi janarmaidyń "kóleńkeli" jolmen shetelge shyǵarylýyn tejeý maqsatynda shekaralas elderden keletin kólikterge jańa shekteý engizdi, dep habarlaidy ult.kz.
Energetika vitse-ministri Qaiyrhan Tutqyshbaevtyń aitýynsha, endi shekaralas memleketterden keletin jeńil jáne júk kólikteri Qazaqstan aýmaǵyna táýligine bir retten artyq kire almaidy.
Sonymen qatar quzyrly organdar qosymsha janarmai baktary ornatylǵan kólikterdi anyqtaýǵa erekshe nazar aýdaryp jatyr. Mundai baktar kóbine janarmaidy zańsyz alyp shyǵý úshin paidalanylady.
Úkimettiń málimetinshe, sońǵy eki táýliktiń ózinde shekara beketterinde:
- 61 zańsyz janarmai áketý áreketiniń joly kesildi;
- qosymsha baktar men kanistrlerden 3 tonnadan astam janarmai tárkilendi.
Eske salaiyq, buǵan deiin BAQ-ta Resei azamattarynyń Qazaqstanǵa arzan janarmai alý úshin jii kele bastaǵany týraly aqparat taraǵan edi. Ásirese Samaradan shamamen 200 shaqyrym jerde ornalasqan Oral qalasynda suranys kúrt artqany habarlanǵan.
