Qazaqstan ulttyq telearnasy 10 tamyzda táýlik boiy Abai kúnine arnalǵan baǵdarlamalar usynady, dep habarlaidy "Ult aqparat".
«Qazaqstan» teleradiokorporatsiiasy 10 tamyz - Abai kúnine orai birqatar jańa telejobalar ázirledi. Ulttyq arna 10 tamyzda 12 saǵat efirin Abai murasyna arnasa, uly oishyl atymen qurylǵan «Abai tv» arnasy Abaidyń qundy muralaryn dáripteýge baǵyttalǵan jobalardy bir kún boiy, úzilissiz kórsetedi«, - delingen telearna baspasóz qyzmeti taratqan aqparatta.
«Qazaqstan» telearnasynyń tańǵy efiri 06:40-ta Abaidyń 175 jyldyq mereitoiynyń ashylýyna arnalǵan «Qazaq halqy – Abaidyń halqy» jobasymen bastalyp, 08:00-de eki saǵat boiy tikelei efirdegi «Tańsholpan» tańǵy aqparattyq-sazdy baǵdarlamasymen jalǵasady. Baǵdarlamaǵa Abaidyń jienshary Láilá Muqlisqyzy qatysady. Sonymen qatar Jidebeidaǵy Abai mýzei-úiinen tikelei bailanys ornatylady.
Caǵat 13:30-da abaitanýshy, ǵalym Mekemtas Myrzahmetovtiń «Nur Tileý» baǵdarlamasyna bergen suhbaty, 14:00-de aqynnyń urpaǵy Turaǵul Abaiuly týraly «Beimálim Alash» derekti filmi kórsetiledi.
Ulttyq arna efirinen kúzgi maýsymǵa josparlanǵan qoǵam qairatkeri, QR Parlamenti Májilisiniń depýtaty Bekbolat Tileýhan júrgizetin «Abaidyń joly» jańa jobasy da Abai kúninde saǵat 17:45-te alǵashqy shyǵarylymyn usynady. Baǵdarlama hákim Abaidyń tereń de aýqymdy shyǵarmalaryn búgingi oqyrmanǵa jatyq, qarapaiym tilmen túsindiredi. Joba Abai óleńderi men qara sózderine keiingi urpaqtyń qyzyǵýshylyǵyn oiatyp, sol arqyly ar-uiat, kórkem minez, bilimge qushtarlyq, ultqa mahabbat, otansúigishtik, baýyrmaldyq, meiirim sekildi asyl qasietterge qulshyndyrýdy maqsat etedi.
Jaqynda tusaýy kesilgen, ár jeksenbi 20:00-de shyǵatyn «Kúmis kómei» ulttyq mýzykalyq-tanymdyq baǵdarlamasynyń osy aptadaǵy shyǵarylymy Abai ánderine arnalady. Aqyn ánderi tanymal dástúrli ánshilerdiń oryndaýynda shyrqalyp, olardyń shyǵý tarihyna saiahat jasalady. Joba 9-10 tamyz kúnderi efirge shyǵady.
10 tamyz kúni 20:30-da QR Memlekettik hatshysy Qyrymbek Kósherbaevtyń «Abai tv» arnasynyń «Sarasóz» baǵdarlamasyna bergen suhbaty usynylady. 20:50-de ataýly kúnge arnaiy ázirlengen «Abai» jobasy efirge shyǵady. Joba qazaq rýhaniiatynyń qundy murasyna ainalǵan «Abai jolynyń» jazylý tarihy týraly baiandaidy.
Odan bólek, Abai kúnine arnalǵan baǵdarlamalar kestesine «Qunanbai» kórkem filmi, «Adamzattyń alyby – hákim Abai» respýblikalyq aqyndar aitysy, «Abai ánderi» teatrlandyrylǵan kontserti, «Adamzattyń bárin súi» atty Abai ánderiniń keshi engizildi.
«Qazaqstan» teleradiokorporatsiiasy buǵan deiin jariia etkendei, Abaidyń 175 jyldyq mereitoiy qarsańynda túsirip jatqan «Abai» telehikaiasyn kórermenge kúzgi maýsymda tartý etedi. Kópbólimdi týyndynyń tusaýkeseri tamyz aiyna, aqynnyń týǵan kúnine josparlanǵan, alaida koronavirýs indetine bailanysty túsirilim jumystary keshiktirilýde.
