Búgin Ortalyq kommýnikatsiialar qyzmetindegi brifingte «Qazaqstan» UTA Aqparattyq-saraptamalyq baǵdarlamalar direktsiiasynyń direktory Erlan Atambai elorda kúninde qandai jobalar kórsetiletindigin aitty, dep habarlaidy QazAqparat tilshisi.
«Astana elimizdiń bas qalasy ǵana emes, Táýelsiz elimizdiń tarihi qalasyna ainaldy. Búginde Astanada mańyzdy halyqaralyq is-sharalar, álemdik oqiǵalar turaqty túrde ótedi. Astananyń 20 jyldyǵyna orai korporatsiiamyzdyń shyǵarmashylyq toby 10-nan astam derekti film men arnaiy joba daiyndady. 6 shilde kúni saǵat 19:00-de efirge shyǵatyn «Astana tynysy» atty derekti filmdi erekshe atap ótkim keledi. Bul film sondai-aq Qytaidyń CGTN-Russian, Qyrǵyzstannyń KTRK, Ózbekstannyń NTRK, Túrkiianyń TRT Avaz, Mońǵoliianyń Sky News jáne basqa da elderdiń telearnalarynan kórsetiletindigin josparlaýdamyz», - dedi ol.
Onyń aitýynsha, «Qazaqstan» ulttyq arnasy shildeniń 2-nen bastap 8-ne deiin Astananyń mereitoiyna arnalǵan arnaiy jańa jobalar men derekti filmderdi usynatyn bolady. Olardyń qatarynda «Bir sýrettiń tarihy», «Elbasy eleń-alań», «Elbasy súigen el áni», «El júregi Astana», «Elorda infraqurylymy», «Astana - arman qala», «Elorda esebi», «Jasai ber ásem Astana», «Ulttyq arnada umytylmas ánder» jáne taǵy da basqa tyń jobalar bar. Sonymen qatar Erlan Atambaev 6 shilde kúni kórsetiletin «Nursultan Nazarbaevtyń Orta Aziianyń jańǵyrýyndaǵy róli» dep atalatyn jobaǵa da keńinen toqtaldy.
«Jobany daiyndaý barysynda, Qyrǵyzstan, Tájikstan, Ázerbaijan, Túrkiia elderiniń qoǵam qairatkerlerinen, saiasatkerleri men sarapshylarynan suhbat aldyq. Uzaqtyǵy 25 minýt bolatyn jobamyz tolyq daiyn. Biz jobany altynshy shilde kúni efirge saǵat 20.40-ta shyǵaramyz», - dedi direktsiia direktory.
Onyń sózine qaraǵanda, ulttyq arna 6 shilde kúni 5 saǵatqa jýyq tikelei qosylýlarymen erekshelenbek. Atap aitqanda, saǵat 13.00-de «Aqparat» baǵdarlamasy kóshpeli stýdiiadan merekelik shyǵarylymyn usynady. Qala boiynsha ótip jatqan barlyq merekelik sharalardy tolyq qamtityn bolady. Ulttyq arna júrgizýshileri Qymbat Dosjan men Janserik Beiseev kórermendermen, qala qonaqtarymen kezdesip, túrli viktorinalar uiymdastyrsa, Daniiar Meńilbekov, Irina Tán, Meiirjan Álibekuly, Dana Nurjigit, Qairat Ádilkereiler kórermenmen júzdesip merekelik sharalar ortasynan tikelei qosylady.
«Basty taqyryp», «Másele» jáne «Elden Habar» baǵdarlamalary da el ishinen tikelei efirge qosylady. Qyzyqty spikerler, tamasha oiyndar, viktorinalar ótkiziledi. Kóshpeli stýdiianyń sońǵy qosylýy saǵat 17.00-de. Barlyq aimaqtardaǵy ótip jatqan sharalardy qamtýmen qatar, kúndelikti qorytyndy jańalyqtar keshki 20.00-da shyǵady.
