Shymkent qalasynda jeńil atletikadan XXXV Qosanov Memorial World Athletics Continental Tour Bronze Level halyqaralyq týrniri máresine jetti, dep habarlaidy ult.kz.
Eki kúnge sozylǵan dúbirli doda qorytyndysy boiynsha Qazaqstan quramasy 11 altyn, 13 kúmis jáne 18 qola medal jeńip alyp, jalpykomandalyq esepte birinshi orynǵa ie boldy. Ekinshi oryn Ózbekstan quramasyna tiesili bolsa, úzdik úshtikti Qyrǵyzstan sportshylary túiindedi.
Qazaqstan quramasy sapynda Mariia Efremova (uzyndyqqa sekirý jáne úsh qarǵyp sekirý), Maksim Balabin (syryqpen sekirý), Adelina Zems (400 metrge kedergiler arqyly júgirý), Viacheslav Zems (400 metrge kedergiler arqyly júgirý), Efim Tarassov (400 metrge júgirý), Aiana Bolatbekqyzy (1500 metrge júgirý), Kristina Minkovskaia, Mariia Shipacheva, Anastasiia Kononovich jáne Elizaveta Iakimenko (4×100 metrlik estafeta), Ramazan Shaiev (800 metrge júgirý), Polina Ivanova (syryqpen sekirý) men Aqbilek Quralbai (5000 metrge júgirý) jeńimpaz atandy.
Týrnirde eki altyn medal jeńip alǵan Mariia Efremova bul jarystyń ózi úshin erekshe mańyzǵa ie bolǵanyn aitty.
«Bul jarysqa úlken jaýapkershilikpen daiyndaldym. Shymkenttegi týrnir biylǵy maýsymdaǵy ekinshi jarysym boldy. Aziia chempionatyndaǵy sátsizdikten keiin Ǵusman Qosanov memorialynda eki altyn medal jeńip alyp, eki baǵdarlamada da joǵary deńgeide óner kórsete alatynymdy dáleldedim. Óz nátijeme joǵary baǵa beremin. Úsh qarǵyp sekirý – negizgi baǵdarlamam bolsa, uzyndyqqa sekirýdi daiyndyqtyń bir bóligi retinde paidalanyp, ózimdi synap kórdim.
Biylǵy maýsymdaǵy basty maqsatymyz – Aziia oiyndary. Sondyqtan bul týrnirdi sol mańyzdy dodaǵa aparar daiyndyqtyń alǵashqy kezeńi dep aitýǵa bolady», – dedi Mariia Efremova.
Jaqynda ǵana Aziia chempionatynda bes dúrkin jeńimpaz atanǵan Adelina Zems te Shymkenttiń óziniń sporttyq jolyndaǵy orny erekshe ekenin atap ótti.
«Osydan on jyl buryn dál osy qalada alǵash ret Qazaqstan chempionatynda jeńiske jetip, kásibi sporttaǵy jolymdy bastadym. Sondyqtan Shymkentke árdaiym erekshe yqylaspen kelemin. Munda ár jarys saiyn nátijemdi jaqsartyp júrgendeimin.
Búgingi jarysqa daiyndyq ońai bolǵan joq. Jattyqtyrýshymmen birge túrli qiyndyqtardy eńserdik. Sondyqtan eń aldymen onyń senimin aqtaǵym keldi. Jaqyndarymnyń qoldaýynyń arqasynda alǵa qoiǵan maqsatqa qol jetkizdim dep oilaimyn», – dedi sportshy.
Qazaqstan jeńil atletika federatsiiasynyń prezidenti Ashat Hasenov Ǵusman Qosanov memorialynyń eldegi jeńil atletika úshin mańyzy zor ekenin atap ótip, júldegerlerge arnaiy aqshalai syiaqy qarastyrylǵanyn jetkizdi.
«Ǵusman Qosanov memorialy – Qazaqstandaǵy jeńil atletika kúntizbesindegi eń bedeldi jarystardyń biri. Biyl bul týrnir 35-ret uiymdastyrylyp, taǵy da ártúrli elderden kelgen úzdik jeńil atletterdi bir alańǵa jinady. Eki kún boiy sportshylar jeńil atletikanyń 30-ǵa jýyq baǵdarlamasy boiynsha baq synap, jarystyń joǵary deńgeii men aýqymyn taǵy bir márte dáleldedi. Biz úshin qazaq jeńil atletikasynyń ańyzy Ámin Tuiaqovtyń jáne Olimpiada chempiondarynyń jastardy qoldaý úshin arnaiy kelýi – úlken mártebe.
Biyl Federatsiia alǵash ret 1–6 oryn alǵan sportshylarǵa aqshalai syiaqy taǵaiyndady. Bul – sportshylardy qoldaý, jeńil atletikany damytý jáne jańa jetistikterge yntalandyrý jolyndaǵy mańyzdy qadam», – dedi Qazaqstan jeńil atletika federatsiiasynyń prezidenti Ashat Hasenov.
Týrnir barysynda bir jarys rekordy jańartyldy. Erler arasyndaǵy 1500 metrge júgirýde Qyrǵyzstan ókili Nursultan Keneshbekov 3:43.51 nátije kórsetip, ózine tiesili 2021 jyldan beri saqtalyp kelgen jarys rekordyn jańartty.
Biylǵy halyqaralyq týrnirge Qazaqstan, Ózbekstan, Qyrǵyzstan, Tájikstan, Túrikmenstan, Malaiziia, Iran, Egipet, Saýd Arabiiasy, Ázerbaijan jáne Grýziiadan 250-ge jýyq sportshy qatysty. Jarys 30 maýsym men 1 shilde aralyǵynda Shymkent qalasyndaǵy Qajymuqan Muńaitpasov atyndaǵy ortalyq stadionda ótti.
