«Qazaqmys korporatsiiasy» JShS «Jomart» kenishindegi ózdiginen júretin jerasty tehnikasyna statsionarlyq datchik – metan-rele ornatyp jatyr. Jańa júie tehnika jumys istep turǵan kezde aýadaǵy metan mólsherin úzdiksiz baqylap, metan kontsentratsiiasy belgilengen shekti deńgeiden asyp ketse, tehnikany avtomatty túrde cóndiredi.
Búginde ózdiginen júretin jerasty tehnikasyna 31 metan-rele ornatyldy. Taǵy 31 tehnikaǵa montajdaý jumysy júrgizilip jatyr. Jumys tolyq aiaqtalǵannan keiin 62 birlik tehnika metandy avtomatty baqylaý júiesimen jabdyqtalady.
Metan-rele kenishtegi aýanyń quramyn úzdiksiz baqylaýda ustaidy. Metan kontsentratsiiasy belgilengen shekti deńgeige jetken kezde júie tehnikanyń jumysyn avtomatty túrde buǵattaidy. Bul sheshim metan mólsheri ruqsat etilgen shekten asyp ketken jaǵdaida tehnikany paidalanýǵa tyiym salyp, jerasty taý-ken jumysyn júrgizý kezinde qaýip-qaterdi azaitýǵa múmkindik beredi.
Avtomatty júieden bólek, «Jomart» kenishinde aýa quramyn baqylaýǵa arnalǵan 130 portativti gaz taldaǵysh qoldanylady. Baqylaý táýlik boiy júrgiziledi, al statsionarlyq datchikterden alynǵan aqparat naqty ýaqyt rejiminde biryńǵai dispetcherlik ortalyqqa túsip otyrady.
Metan-rele ornatý – «Jomart» kenishindegi óndiristik qaýipsizdikti arttyrýǵa baǵyttalǵan keshendi baǵdarlamanyń bir bóligi. Baǵdarlama aiasynda barlyǵy 45 is-shara qarastyrylǵan. Onyń 39-y júzege asyryldy, qalǵany aiaqtalýǵa jaqyn. Baǵdarlamanyń jalpy qarjylandyrý kólemi 2,7 mlrd teńgeni quraidy.
Baǵdarlama aiasynda kenishtegi jumyskerlerdiń ornalasqan jerin baqylaý júiesi de damytylýda. 15,5 shaqyrym sáýle taratatyn kabel tartylyp, jeke qorǵanys quraldaryn tekserýge arnalǵan terminaldar men beinebaqylaý júiesi ornatyldy. 2026 jylǵy shildede taý jynysy massiviniń jaǵdaiyn baqylaýǵa arnalǵan biryńǵai tsifrlyq geomehanikalyq monitoring júiesi iske qosyldy.
Iske asyrylyp jatqan keshendi sharalar óndiristik qaýipsizdiktiń ártúrli baǵyttaryn kezeń-kezeńimen kúsheitýge múmkindik beredi. Ol kenish aýasynyń quramyn baqylaýdy, jabdyqty avtomatty túrde qorǵaýdy, jumyskerlerdiń ornalasqan jerin anyqtaýdy jáne taý-ken qazbasynyń jaǵdaiyn turaqty nazarda ustaýdy qamtidy.
Jumys Qazaqmystyń 2026-2028 jyldarǵa arnalǵan óndiristik qaýipsizdikti transformatsiialaý strategiiasy aiasynda júrgizilýde. 2026 jyl kompaniiada Óndiristik qaýipsizdik jyly dep jariialanǵan.
