Otandyq televiziia salasyna 40 jyldan astam ýaqytyn arnaǵan ardager telejýrnalist, Qazaqstan Jýrnalister odaǵynyń laýreaty Tileýqabyl Myńjasar dúnieden ótti, dep habarlaidy ult.kz.
Qaraly habardy jýrnalist Rinat Kertaev jetkizdi.
Tileýqabyl Myńjasar jýrnalistikany ómiriniń máni sanaǵan kásibi maman boldy. Ol uzaq jyldar boiy Almaty oblysynyń aýyl-aimaǵyn aralap, el ishindegi ózekti máselelerdi respýblikalyq telearna efirine shyǵardy. Qarapaiym halyqtyń muń-muqtajyn jetkizip, óńirdegi mańyzdy oqiǵalardy aqparat keńistigine shyǵarýǵa úles qosty.
Ardager jýrnalisttiń kásibi joly 1975 jyly bastaldy. Sol jyly ál-Farabi atyndaǵy Qazaq ulttyq ýniversitetiniń jýrnalistika fakýltetin támamdap, Qazaq jasóspirimder televideniesinde alǵashqy habary efirge shyqty.
Keiin Tileýqabyl Myńjasar otandyq televiziiada uzaq jyl eńbek etip, «Habar» agenttiginiń Almaty oblysyndaǵy menshikti tilshisi qyzmetin atqardy. Ol agenttik qurylǵan kúnnen bastap ujymmen birge jumys istedi.
Kásibi eńbegi eleýsiz qalǵan joq. Tileýqabyl Myńjasar «Eńbekte úzdik shyqqany úshin» medalimen, Qazaqstan Prezidentiniń Alǵys hatymen marapattalǵan. Qazaqstan Jýrnalister odaǵynyń laýreaty atanyp, Almaty oblysynyń qurmetti azamaty boldy. Sondai-aq «Habar» agenttiginiń «Altyn mikrofonyna» ie boldy.
Tileýqabyl Myńjasar Túrkistan qalasynda dúniege kelgen. Ol ǵumyryn jýrnalistikaǵa arnap, otandyq televiziia tarihynda ózindik qoltańbasyn qaldyrdy.
