QAZAQ AIR áýe kompaniiasy elordadan Jezqazǵan qalasyna ushyp shyqqan ushaǵyndaǵy aqaýdyń neden bolǵanyn túsindirdi, dep habarlaidy "Ult aqparat".
«12 qyrkúiekte QAZAQ AIR áýe kompaniiasynyń elordadan Jezqazǵanǵa ushyp shyqqan ushaǵy qaityp oraldy. Bundai keleńsizdik eki ret oryn alǵan. Kompiýter shassidiń jabylmai qalǵanyn kórsetkendikten ushaqtyń oralýyna týra keldi. Baiǵus jolaýshylar», - dep jazǵan edi «Vremia» gazetiniń tilshisi Mihail Kozachkov Telegram paraqshasynda.
Osyǵan orai QAZAQ AIR áýe kompaniiasy atalǵan ushaqqa qatysty keleńsiz oqiǵa 11 jáne 12 qyrkúiek kúnderi oryn alǵandyǵyn habarlady.
«11 qyrkúiekte ushaq ushyp shyqqannan keiin ekipajǵa shassidiń sol jaqtaǵy negizgi tireginiń qaqpasy jabylmai qalǵany týraly indikatsiia kóringen. Ekipaj chek-paraqshaǵa jáne jazylǵan protsedýralarǵa sáikes áreket etip, ushyp shyqqan áýejaiyna oraldy. Injenerlik-aviatsiialyq qyzmet atalǵan oqiǵanyń sebebin anyqtaý úshin keshendi sharalar júrgizdi. Sodan keiin ushaq odan ary paidalanýǵa jiberildi. Biraq, ushaq ushyp shyqqannan keiin dál sol oqiǵa qaitalanyp, ekipaj qaýipsizdik protsedýralaryna sáikes ushyp shyqqan áýejaiǵa qaityp keldi. Birinshi jáne ekinshi oqiǵa kezinde de apattyq jaǵdai jariialanǵan joq. Ushaqtyń qonýy shtattyq rejimde júrgizildi jáne jolaýshylardyń ishinen meditsinalyq kómekke júgingender bolmady», - dep atap ótedi kompaniiadan.
Osydan keiin injenerlik-aviatsiialyq qyzmet áýe kemesin jasaýshy nusqaýlyǵyna sáikes jumystardy júrgizgen. Ushaqtan eshqandai aqaý tabylmaǵandyqtan standartty protsedýralarǵa sáikes qaita ushyrylǵan.
«12 qyrkúiekte dál osy aqaý Nur-Sultan qalasy áýejaiynan ushyp shyqqan kezde paida boldy. Ekipaj chek-paraqshaǵa sáikes áreket etip, ushyp shyqqan áýejaiǵa oraldy. Qoný shtattyq rejimde júrdi, apatty jaǵdai jariialanǵan joq. Meditsinalyq kómekke jolaýshylardan eshkim júginbedi. Injenerlik-aviatsiialyq qyzmet aqaý sebebin tyńǵylyqty izdep, nátijesinde solenoidpen júieli basqarý qaqpaqshasy aýystyryldy. Áýe kemesine tehnikalyq jumystar júrgizilgennen keiin 13 qyrkúiek kúni áýe kemesi áýejai aýdanynda jolaýshysyz ushyp ótti. Testilik ushý sátti bolǵannan keiin áýe kemesi odan ary paidalanýǵa jiberildi» delingen kompaniia aqparatynda.
