Astana qalasynyń qylmystyq ister jónindegi aýdanaralyq soty QARMET kásipornyna 1,5 mlrd teńgeden astam zalal keltirgen uiymdasqan qylmystyq toptyń 13 múshesin kináli dep tanydy, dep habarlaidy ult.kz.
Bas prokýratýranyń málimetinshe, 2021 jyldyń qańtarynan 2023 jyldyń jeltoqsanyna deiin sottalýshy A.-nyń basshylyǵymen top músheleri QARMET-ke sapaly metall synyqtarynyń ornyna shlak, qum, qiyrshyq tas jáne ózge de qospalar aralas qaldyqtardy jetkizip otyrǵan.
Qylmystyq top músheleri arasynda aldyn ala mindetter bólingen. Olar vagondardyń kedergisiz ótýin, júktiń tez túsirilýin jáne qaldyq kólemi týraly kórsetkishterdiń ádeii tómendetilýin uiymdastyrǵan.
Sot anyqtaǵan zalal kólemi 1 mlrd 503 mln 954 myń teńgeni qurady.
Memlekettik aiyptaýshylardyń ustanymyn eskere otyryp, sot qylmystyq jolmen alynǵan qarajatqa satyp alynǵan kólik pen jyljymaityn múlikti, sondai-aq bank shottaryndaǵy qarajatty memleket kirisine tárkileý týraly sheshim shyǵardy. Tárkilengen múliktiń jalpy quny shamamen 1 mlrd teńge boldy.
Budan bólek, sot QARMET AQ-nyń azamattyq talabyn qanaǵattandyryp, sottalǵandardan ortaq tártippen 803 mln 954 myń 694 teńge óndirip alý týraly sheshim qabyldady.
Úkim ázirge zańdy kúshine engen joq.
