Qaraǵandyda zeinetkerge qaraqshylyq shabýyl jasap, altyn alqasyn julyp ketken degen kúdikpen 30 jastaǵy qala turǵyny ustaldy. Tergeý barysynda onyń urlyqqa da qatysy bary anyqtaldy, dep habarlaidy ult.kz.
Polisia.kz málimetinshe, oqiǵa dúisenbi kúni kúndiz bolǵan. 67 jastaǵy áiel dúkennen úiine qaityp kele jatqanda, artynan júgirip kelgen belgisiz er adam moinyndaǵy altyn alqany julyp alyp, oqiǵa ornynan qashyp ketken. Jábirlenýshi keltirilgen shyǵyndy 400 myń teńgege baǵalaǵan.
Zeinetker birden politsiiaǵa habarlasyp, kúdiktiniń syrtqy kelbetin naqty sipattap bergen. Jedel izdestirý sharalarynyń nátijesinde tártip saqshylary kúdiktiniń jeke basyn anyqtap, ony qysqa ýaqyt ishinde ustady.
Kúdikti óz kinásin tolyq moiyndap, urlanǵan altyn alqany lombardqa ótkizip úlgergenin aitqan. Alaida politseiler zergerlik buiymdy aiǵaqty zat retinde tárkilep, qaitaryp aldy.
Tergeý barysynda kúdiktiniń bul qylmysty aldyn ala josparlamaǵany belgili bolǵan. Alaida oǵan deiin velosiped urlaǵany anyqtaldy. Tergeý nusqasyna sáikes, ol urlanǵan velosipedpen kele jatyp, moinynda altyn alqasy bar zeinetkerdi baiqaidy. Keiin velosipedti jaqyn mańdaǵy aýlalardyń birine qaldyryp, áielge shabýyl jasap, alqany julyp alǵan soń qaitadan velosipedke minip, izin sýytqan.
Qazirgi ýaqytta urlanǵan velosipedtiń zańdy iesi anyqtalyp, múlki ózine qaitarylǵan.
Kúdikti sotqa deiingi tergep-tekserý kezeńine ýaqytsha ustaý izoliatoryna qamaldy. Tergeý jalǵasyp jatyr. Politseiler onyń osyǵan uqsas ózge de qylmystarǵa qatysy bar-joǵyn tekserýde.
