Resei prezidenti Vladimir Pýtin Ýkrainadan astyq áketýge kedergi keltirmeitinin málimdedi. Ol bidaidy Resei basyp alǵan Mariýpol men Berdiansk porttary arqyly, odan ári Kiev baqylaýyndaǵy porttar men temir jol arqyly Rýmyniia, Polsha nemese Belarýske shyǵýdy usyndy. Pýtinniń suhbatynan úzindini "Rossiia-24" arnasy keltirdi, dep habarlaidy Azattyq.
Pýtin Kiev Qara teńiz porttaryn minadan tazartsa, astyq tiegen ýkrain kemelerine tiispeitinin jetkizdi. Ol "álemniń azyq-túlik naryǵyndaǵy daǵdarys Resei áreketiniń saldarynan nasharlady" degen tujyrymdy joqqa shyǵardy. Onyń aitýynsha, teris dinamika soǵysqa deiin bastalǵan.
Resei men Ýkraina álemdegi eń iri bes astyq óndirýshiler qataryna kiredi. Resei armiiasy Ýkrainaǵa basyp kirgennen keiin azyq-túlik quny kúrt qymbattady. Astyq pen otynnyń qymbattaýy kez kelgen tamaq túriniń baǵasyna áser etedi. BUU bas hatshysy Antoniý Gýterrish soǵys jaǵdaiynda álemniń 43 elinde turatyn 49 mln adamǵa ashtyq qaýpi tónip turǵanyn aitty.
BUU Máskeýden Ýkrainadan astyqty Resei porttarynan alyp ketýge múmkindik berýdi suraǵan. Bul másele Pýtin men Frantsiia prezidenti Emmanýel Makron, Germaniia kantsleri Olaf Sholts jáne Túrkiia basshysy Rejep Erdoǵanmen kelissóz kezinde talqylanǵan.
Máskeý sanktsiia alynsa, azyq-túlik tasymalyn kóbeitýge daiar ekenin málimdegen. Al AQSh memlekettik departamenti AQSh sanktsiiasy Reseiden aýyl sharýashylyǵy ónimderi men tyńaitqysh eksporttaýǵa múmkindik beredi, demek tasymaldaýǵa áser etpeidi degen.
