Frantsiia Prezidentiniń Keńsesi "norman tórttigi" sammiti 9 jeltoqsanda Parijde ótetinin habarlady.
Ýkraina shyǵysyndaǵy jaǵdai jáne ony retteý amaldary talqylanatyn sammitte Resei prezidenti Vladimir Pýtin jáne Ýkraina basshysy Vladimir Zelenskii alǵash ret betpe-bet kezdesedi. Sońǵy úsh jylda alǵash ret ótip otyrǵan sammitke Frantsiia Prezidenti Emmanýel Makron, Germaniia Kantsleri Angela Merkel de qatysady.
Ýkraina Prezidenti ákimshiliginiń habarlaýynsha, sammitke daiyndyqty Zelenskii men Makron uiymdastyryp jatyr. Frantsiia basshysy jaqyn arada Ýkrainaǵa barmaq. Ýkraina Prezidenti ákimshiligi habarlamada Makronnyń "Ýkraina budan bylai barlyq másele boiynsha Frantsiiaǵa arqa súiei alady" degen sózin keltiredi.
Kreml sammit ýaqytyna qatysty túsinikteme bermedi.
Resei men Ýkraina arasy 2014 jyly Resei Qyrym túbegin anneksiialap, Ýkrainanyń shyǵysyndaǵy separatisterge qoldaý kórsetkennen keiin ýshyqqan. 2014 jyldyń sáýir aiynan beri qarýly qaqtyǵys kezinde 13 myńnan astam adam kóz jumǵan.
Osy aptada Qazaqstannyń Tuńǵysh Prezidenti Nursultan Nazarbaev Vladimir Zelenskii men Vladimir Pýtin arasynda Nur-Sultan qalasynda kelissóz ótkizýdi usynǵan bolatyn. Kiev pen Máskeý bul usynysty qabyldamady.
"Norman tórttigi" sammiti - Ýkrainanyń shyǵysyndaǵy janjaldy retteý úshin 2014 jyldan beri jumys istep kele jatqan Ýkraina, Resei, Frantsiia jáne Germaniia jetekshileri men syrtqy ister ministrliginiń kezdesý formaty.
