Resei prezidenti Vladimir Pýtin Aziiadaǵy ózara is-qimyl jáne senim sharalary jónindegi keńestiń (AÓSShK) VI sammitinde Resei qazaqstandyq tóraǵalyqtyń bastamalaryn qoldaitynyn málimdedi, - dep habarlaidy "Ult aqparat" Massaget.kz portalyna silteme jasap.
"Búgingi kezdesý jahandyq saiasat pen ekonomikadaǵy eleýli ózgerister aiasynda ótip jatyr. Álem shynymen kóppoliarly bolyp jatyr. Bul oraida Aziia basty ról oinai bastady", - dedi Resei prezidenti.
Óz sózinde ol Aýǵanstan aýmaǵyndaǵy jaǵdaidy qalypqa keltirý úshin "onyń ekonomikalyq qalpyna kelýine birlesip járdemdesý qajet" ekenin atap ótti. Pýtin "okkýpatsiia jyldarynda aýǵandyqtarǵa keltirilgen zalaldyń ornyn toltyrýǵa jáne zańsyz buǵattalǵan aýǵan qarajatyn jumsaýǵa" shaqyrdy.
"Bizdiń Aziiadaǵy kóptegen seriktesimiz siiaqty, ondaǵan jyl boiy kapital men tehnologiianyń barlyq aǵynyn qamtyǵan ózin-ózi jariialaǵan "altyn milliard" bireýdiń esebinen ómir súrýge múmkindik beretin álemdik qarjy júiesiniń jumys printsipterin qaita qaraýdy bastaý qajet dep sanaimyz. Birinshi kezektegi qadam retinde ózara esepteýde ulttyq valiýtalardyń neǵurlym belsendi qoldanylýyn kóremiz. Mundai sharalar memleketterimizdiń qarjylyq egemendigin nyǵaitýǵa, kapitaldyń ishki naryqtaryn damytýǵa, óńirlik ekonomikalyq integratsiialardy tereńdetýge yqpal etetini sózsiz", - dedi ol.
Pýtin Resei AÓSShK-niń barlyq elimen qarym-qatynasty damytatynyn málimdedi.
"Keńeste birlesken jumys ilgerilep kele jatqanyn aita alamyn. Resei osy kezdesýdegi barlyq elmen yntymaqtastyqty odan ári damytady. Qazaqstandyq tóraǵalyqtyń bastamalaryn qoldaimyz", - dep túiindedi Vladimir Pýtin.
Aita keteiik, Astanada Aziiadaǵy ózara is-qimyl jáne senim sharalary jónindegi keńestiń VI sammiti ótip jatyr. Is-sharaǵa 11 memleket basshysy qatysady.
Eske salaiyq, buǵan deiin Resei prezidenti Vladimir Pýtin Astanaǵa kelgeni habarlanǵan bolatyn. Elorda áýejaiynda Resei basshysyn Premer-ministr Álihan Smaiylov kútip alǵan edi.
