Prezident Vladimir Pýtin Ýkraina shyǵysyndaǵy Lýgansk jáne Donetsk oblystaryna Resei áskerin kirgizý týraly buiryq berdi. Bul jóninde dúisenbi kúni "Lýgansk halyq respýblikasy" jáne "Donetsk halyq respýblikasynyń" táýelsizdigin moiyndaý týraly jarlyqta jazylǵan, dep habarlaidy "Ult aqparat" Azattyqqa silteme jasap.
Jarlyqta Pýtin Resei qarýly kúshterine atalǵan "respýblikalarda" beibitshilikti nyǵaitý mindetin tapsyrǵan.
Azattyqtyń Orys qyzmetiniń jazýynsha, ázirge ásker kirgeni jóninde rastalǵan aqparat joq. Alaida áleýmettik jelilerde Donetskide áskeri tehnikalardyń ketip bara jatqany kórinetin videolar paida boldy.
Ýkraina men Batys elderi jáne separatisterdiń ózderi Donbasta buǵan deiin de Resei áskeri baryn aitqan.
Dúisenbi kúni Pýtin Ýkraina shyǵysynda "Lýgansk halyq respýblikasy" jáne "Donetsk halyq respýblikasynyń" táýelsizdigin moiyndaý týraly qaýlyǵa qol qoiǵan. Buǵan qosa, Resei men atalǵan "respýblikalarda" dostyq pen yntymaqtastyq ornatý týraly kelisimge de qol qoiylǵan.
Aqparatqa qaraǵanda, seisenbi kúni memlekettik dýma men federatsiia keńesi Resei men separatistik respýblikalar arasynda kelisimdi ratifikatsiialap, sol kelisim negizinde Resei áskeri kómek kórsetedi. Dúisenbi kúni Pýtin separatistik respýblika jetekshilerimen qol qoiǵan kelisimde taraptar "bir-birine qajetti kómek (áskeri kómek te) kórsetedi" dep jazylǵan. Buǵan qosa, bir-biriniń aýmaǵynda áskeri baza salý múmkindigi týraly aitylǵan.
Kelisimde Resei separatistik respýblikalardyń qai aýmaǵyn tanityny jazylmaǵan. "DNR" men "LNR" qazir Donetsk jáne Lýgansk oblystary aýmaǵynyń úshten birin baqylaidy. Al qalǵan úshten ekisi Ýkraina baqylaýynda. Alaida separatisterdiń ózderi eki oblystyń aýmaǵyna tutas ielik etemiz dep esepteidi.
