PTR test baǵasyna qatysty zań buzýshylyq anyqtalǵan jaǵdaida kompaniianyń bir jyl boiǵy jalpy kiris mólsheriniń 5%-yn aiyppul retinde ustap qalady. Bul týraly «Kun.kz» saitynda «JQQ, PTR diagnostikasy jáne dári-dármekter naryǵynda baǵa belgileý» taqyrybynda onlain formatta ótken pikirtalasta aityldy, jep habarlaidy QazAqparat.
«PTR diagnostikasy naryǵynda testtiń quny ártúrli. 10 myń – 18 myń teńge aralyǵynda. Bul baǵalarǵa qatysty birqatar suraq týyndaidy. Osy jaǵdaida biz PTR diagnostikasy naryǵyna ne usynǵymyz keletinin, tekserý jumystaryn júrgizgen jaǵdaida onyń nátijesi qandai bolatynyn aityp óteiin. PTR test baǵasyna qatysty zań buzýshylyq anyqtalǵan jaǵdaida kompaniianyń bir jyl boiǵy jalpy kiris mólsheriniń 5%-yn aiyppul retinde ustap qalamyz. Sondai-aq, kompaniia baǵany kóterý arqyly alǵan monopoliialyq kiristi de ustap qalamyz», - deidi Básekelestikti qorǵaý jáne damytý agenttiginiń tóraǵasy Serik Jumanǵarin.
Ol PTR diagnostikasy naryǵyna qatysýshylarǵa kelisimge kelýdi usynatynyn aitty.
«PTR diagnostikasy naryǵyndaǵy barlyq kompaniiany monopoliiaǵa qarsy komplaens aktisin jazýdy usynamyz. Bul QR Kásipkerlik kodeksinde bar. Kompaniia monopoliiaǵa qarsy komplaens aktisine básekelestikke qatysty ustanymdaryn jazady, al biz ol aktini bekitemiz. Kompaniia kórsetiletin qyzmet túriniń quny ne sebepti osyndai ekenin dáleldeý úshin kiris, shyǵys mólsherin ashyq kórsetýi kerek. Aldaǵy aptada osyndai kelisimge kelýdi josparlap otyrmyz. Bizdiń jumysymyzdyń negizgi quraly osy bolmaq. Osy usynystan bas tartqan jaǵdaida kompaniiaǵa tekserý jumysyn júrgizýdi qolǵa alamyz. Negizi bizdiń mindet – jazalaý emes, bizdiń mindet – meilinshe kóp adamdy PTR testten ótkizý. Ótkenderdiń 55%-y óz qarajaty esebinen, al 45%-y MÁMS esebinen tóleýde», - deidi ol.
