Halyqqa psihikalyq kómek kórsetý qoljetimdi bola tústi. Bul týraly QR Densaýlyq saqtaý ministrliginiń Respýblikalyq psihikalyq densaýlyq ǵylymi-praktikalyq ortalyǵy bas direktorynyń mindetin atqarýshy Qýanysh Altynbekov Óńirlik kommýnikatsiialar alańynda ótken brifingide málim etti, dep habarlaidy QazAqparat.
10 qazan – Halyqaralyq psihikalyq densaýlyq kúni.
Biyl Dúniejúzilik psihikalyq densaýlyq kúni «Psihikalyq densaýlyq týraly qamqorlyq barlyǵyna: ony shyndyqqa ainaldyraiyq» uranymen atap ótiledi.
Qýanysh Altynbekovtyń aitýynsha, elimizde 17 aimaqtyq psihikalyq densaýlyq ortalyǵy, qalalyq emhanalardyń qurylymynda 82 alǵashqy psihikalyq densaýlyq ortalyǵy, aýdandyq deńgeide 201 psihikalyq densaýlyq bólmesi qyzmet etedi.
«2018 jylǵa deiin psihiatr dárigerlerdiń qabyldaýy tek psihiatriialyq uiymdarda júzege asyrylatyn. 2021 jyldyń 9 aiynda alǵashqy psihikalyq densaýlyq ortalyqtary men psihikalyq densaýlyq bólmelerine kómekke 297 464 adam júgindi. Kórip otyrǵanymyzdai, halyqqa kórsetiletin kómek burynǵydan qoljetimdi bola tústi. Bul, psihikalyq densaýlyq salasynda naýqasqa baǵdarlanǵan kómek kórsetý úlgisin jetildirýdiń arqasy», - dedi ol.
Sonymen qatar ol psihikalyq densaýlyq ortalyqtarynda psihikalyq aýytqýy bar adamdarǵa 735 tósek-orynǵa arnalǵan 16 kúndizgi statsionar jumys isteitinin aitty.
Balalarǵa kómek kórsetýdi qoljetimdi etýge úlken kóńil bólinip otyr.
«Sońǵy jylda 65 tósek-orynǵa laiyqtalǵan balalarǵa arnalǵan 3 kúndizgi statsionar bólimshesi quryldy. Qaraǵandy oblysy men Shymkent qalasynda aýysymyna 20 júginýdi qamtityn balalarǵa arnalǵan eki meditsinalyq-áleýmettik ońaltý bólimshesi ashyldy. Oǵan qosa densaýlyq saqtaý uiymdarynda balalar psihiatrlarynyń sany artty. Bul kórsetkish 2017 jylǵy 65-ten 2020 jyly 97-ge deiin jetti», - dedi spiker.
Qýanysh Altynbekov psihikalyq densaýlyqty baiypty qabyldaý qajet ekenin atap ótti.
«Psihikanyń buzylýyn emdeýge bolady jáne bul kúrdeli: munda dári-dármekter, terapiia, fizikalyq belsendilik jáne taǵy basqalar bar», - dedi ol.
Dárigerlik kadrlar boiynsha 2021 jyly 124 psihiatr dáriger rezidentýrany aiaqtap, densaýlyq saqtaý uiymdarynda jumys isteýge kirisken.
