Foto ashyq derekkózden alyndy
Astanada jýrnalist Mahambet Ábjanǵa qatysty sot protsesinde prokýror Qojahmetova aiyptalýshyǵa 11 jyl túrme jazasyn surady. Bul týraly jýrnalistiń Telegram-daǵy Abzhan News arnasy habarlady, dep jazady Azattyq.
Aiyptalýshynyń advokaty Gúlnár Súleimenova sot jabyq ótip jatqanyn alǵa tartyp, túsinik berýden bas tartty.
Sot materialdaryna qaraǵanda, Ábjanǵa "kórineý jalǵan aqparat taratý" (274-baptyń 3-bóligi) jáne "bopsalaý" (194-baptyń 4-bóligi, 2-tarmaǵy) baptary boiynsha aiyp taǵylǵan.
Protsess Astananyń qylmystyq ister jónindegi mamandandyrylǵan aýdanaralyq sotynda 6 qańtarda bastalǵan. Iske sýdia Aijan Qulbaeva tóraǵalyq etip jatyr.
Sot úkimi 3 aqpanda saǵat 17.00-de oqylady.
39 jastaǵy jýrnalist ári bloger Mahambet Ábjandy Sybailas jemqorlyqqa qarsy is-qimyl agenttigi byltyr 3 shildede tutqyndaǵan. Agenttik "ol bir kásipkerden 50 million teńge bopsalady" dep habarlaǵan. Ábjan advokaty arqyly taǵylǵan aiyptardy joqqa shyǵarǵan.
Jýrnalist qamaýǵa alynardan eki kún buryn telegram-arnasynda ózin qaralaityn jalǵan aqparattar taralyp jatqanyn jazǵan edi.
Eske salaiyq, buǵan deiingi protsesterde Ábjan sot isti obektiv qaramai jatqanyn alǵa tartyp, sýdia Qulbaevany aýystyrý týraly ótinish jasaǵan. Buǵan iste jábirlenýshi retinde tanylǵan tulǵadan jaýap alý jáne aqshanyń kelý jolyn tutas zertteý týraly ótinishtiń oryndalmaýy sebep bolǵan. Alaida sýdiany aýystyrý týraly ótinish oryndalmady.
Buǵan qosa, aldyn ala tyńdaý kezinde aiyptalýshy men advokaty qysymǵa shaǵymdanǵan. Ol kezde qaraýyl bastyǵy aiyptalýshyǵa "ruqsat etilmegen ádisterdi" qoldanǵany jáne sybailas jemqorlyqqa qarsy is-qimyl agenttigi qyzmetkerleri aiyptalýshynyń jubaiy men týystaryna qoqan-loqy kórsetkeni jaily shaǵym aitylǵan. Izinshe sot qaýly shyǵaryp, prokýratýraǵa oqiǵany tekserýdi tapsyrǵan.
2017 jyly Mahambet Ábjan "alaiaqtyq" baby boiynsha 3,5 jylǵa bas bostandyǵynan aiyrylǵan. 2019 jyly shartty jaza alyp, merziminen buryn bostandyqqa shyqqan.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
